Eksperto nga dili eksperto?

Nagpagawas og Resolution Number 124-B ang Inter-Agency Task Force (IATF) nga nagtugot sa mga nakakompleto na sa bakuna sa pagbiyahi ngadto sa mga lugar nga ubos na sa General Community Quarantine ug Modefied General Community Quarantine nga wala na kinahanglana ang negatibong resolution sa RT-PCR Test. Ang himuon sa nakakompleto na sa bakuna mao nalang ang pagpakita sa ilang card sa bakuna.

Apan ang Resolution 124-B nakasugat og hugot nga pagsupak sa mga mayor ug gobernador sa mga local government units (LGUs) tungod sa rason nga maghimo lamang unya kini nga hinungdan sa pagkuyanap sa coronavirus disease o COVID-19.

Tungod sa pagsupak sa mga mayor ug gobernador sa resolution, ang IATF mikakak ug milikoy. Wala na ipamugos sa task force ang ilang resolution ug gitugotan ang mga LGUs sa pagpangayo o dili og negatibong resulta sa RT-PCR Test.

Mao na ni ron. Kinsa man diay ang eksperto sa pagpanalipod batok sa COVID-19? Ang Inter-Agency Task Force nga gilangkoban sa mga doktor o ang mga mayor ug gobernador nga pila lang kanila ang doktor?

Si Dr. Edsel Maurice Salvana sa IATF mipasabot nga dili garantiya sa tawo ang kompleto niyang bakuna batok sa COVID-19 tungod kay matakdan ra gihapon siya niini. Hinuon gamay lang ang posibilidad nga matakdan siya sa COVID-19.

Mao ba kini ang hinungdan nganong mikakak ug milikoy ang IATF sa pagpatuman sa ilang resolutuion? Ang pagkakak ug paglikoy pag-angkon ba kini sa IATF nga sila mismo dili segurado sa pagka epektibo sa bakuna batok sa COVID? Nga ang tanan nilang gihimo nakakapyot lamang sa lanot sa pamasin? Nga ang matakdan gamay lang kun itandi sa mga nabakunahan nga wala natakdan?

Kining tanan mao ba ang hinungdan nganong mikakak ug milikoy ang IATF nga gilangkoban og mga doktor sa mga mayor ug gobernador nga pipila lang kanila mga doktor tungod kay sila mismo nasayod nga sakto sa ilang panagana ang mga mayor ug gobernador? Hahay COVID-19.