Mga bata ang pangayoan og pasaylo
Wa itago sa World Bank (WB) nga di na ingon ana kabag-o ang mga tinubdan sa ilang report nga nideklarar og krisis sa sistema sa edukasyon sa Pilipinas; pero, sukwahi sa gipatuo ni Education Secretary Leonor Briones, di sab ingon ana kadaan ang ilang kasayuran:
- Una, ang Southeast Asia Primary Learning Metrics (SEA-PLM) sa 2019 nga nahingpit sa Disyembre 2020 na, o pito pa ka buwan ang nilabay;
- Ikaduha, ang Trends in International Mathematics and Science Study (TIMSS) sa 2019; ug
Ikatulo, ang Program for International Student Assessment (PISA) sa 2018.
* * *
Gawas nga nangasaba sa WB, wa magtagad paghisgot si Briones unsa nay gihimo sa Department of Education (DepEd) kay, base sa tulo ka sunudsunod nga kalibotanong pagtuon, seryoso ang krisis sa Pilipinas sa pag-edukar sa atong mga estudyante:
- Sa PISA sa 2018, iwit ang Pilipinas sa reading ug ikaduhang iwit sa science ug mathematics;
- Sa TIMSS sa 2019, iwit ang Pilipinas sa mga nasud sa East Asia sa Mathematics ug Science; ug
- Sa SEA-PLM sa 2019, usa ang Pilipinas sa iwit nga mga nasud sa reading, writing ug mathematics.
* * *
Imbes sabonan ang WB, mas maayong paminawon ni Briones ang ilang mga rekomendasyon:
- Dugangan ang budget sa edukasyon kay ang gasto sa pamunoan ni Presidente Rodrigo Duterte sa kada tinun-an maoy kinaubsan sa tanang nasud nga niapil sa PISA;
- Ibanan ang gidak-on sa mga klase kay kon magpunsisok mas lisod ang pagdisiplina ug pagkat-on;
- Usbon ang screening sa mga magtutudlo kay ang ilang grado sa board exam way epekto sa nakamaohan sa mga estudyante; ug
- Dugangan ang digital learning resources para sa mga magtutudlo ug mga estudyante.
* * *
Imbes modemanda nga mangayo og pasaylo ang WB, mangahas mi og sugyot nga si Briones ug ubang mga tagduma sa DepEd ang mangayo og pasaylo sa kapakyas sa pagtuman sa ilang trabaho ug moluhod atubangan sa mga estudyante nga nag-usik-usik ra diay sa ilang kuwarta ug panahon sa pagtambong sa mga klase nga wa silay nakat-onan.
Makatabang sab sa tanang hingtungdan kon may makahunghong ni Briones nga ang unang lakang pagsulbad sa problema di ang pagtabon ug pagpanghimakak kon dili ang pag-angkon nga dunay problema.
* * *
- Latest
