Mas giseryoso ang komedyante

Mopabuhagay kuno si kanhi Senador Trillanes og mga ebidensya sa kurapsyon nga nabuhat ni Presidente Duterte ug Senador Bong Go agi’g pagmatuod nga ang Malacañang maoy labing kurap nga ahensya sa kagamhanan.  Daw pamolitika ang pamahayag ni Trillanes kay kon dili pa, hayan sa korte siya midangop ug dili sa barahan sa publikon’g opinyon.  Ginaingon nga ang “pamolitika” maoy ikaduha’ng labing daan nga propesyon; nag-una ang “prostitusyon.”  Apan, sa lihok sa mga politiko karon, mora’g naapsan na man ang una’ng propesyon.  Gani ni’ng kabag-ohan, mas giseryoso pa sa katawhan ang komedyante kay sa politiko.  Baya no!

Linglahon bisan ginoo

Namahayag si Presidente Duterte nga may purohan siya’ng molansad pagka-bise presidente kon ugaling mobalibad si House Majority Leader Martin Romualdez sa nominasyon.  Sukwahi ang maong pamahayag karon sa giluwatan kanhi ni Presidente Duterte nga mo-demitir na siya sa iyang katungdanan.  Dili hinoon kahibudngan.  Kay ginaingon man nga “Kon imong sagulan og kamatuoran ang politika, dili na man kini politika” Matud pa bitaw ni William Shakespear, “ang politiko mao kadto’ng tawo nga linglahon bisan ang Ginoo.” Madahaan!

Magpakahoy-kahoy na lang

Miluwat og kusganon’g pasidaan ang pangulo sa China nga si Xi Jinping batok niadtong buot “modaug-daug” sa ilang nasud pinaagi sa pag-ingon nga “Mapusgay ug magkadugo gayod ang mga ulo niadtong mosuway pagpakgang sa pagsulbong sa China”. Duha ang tumong sa maong pasidaan: Una, nga dili na kapugngan ang pagsulbong sa China; ikaduha, nga dili angay suwayan ang pa-ilob sa China.  Malisod suwayan kon matinud-anon ba ang China sa ilang bahad. Haum ni’ng kahimtanga ang pagya, “Ayaw hilabti ang leyon nga nahinanok pagkatulog”. Ni’ng pagpangisog sa China, hayan daghang nasud ang magpa-‘kahoy-kahoy’na lang. Fezteleern!

Gikasilagan ang kompetisyon

Buot ni Secretary Duque nga silotan kadtong ilegal nga mamaligya og COVID-19 vaccines, tungod kay naka-kompromiso kini sa programa sa pagpamakuna sa kagamhanan.Sa kahinay sa dagan sa pagpamakuna, diin mokabat sa 7.5 milyones pa ang nabakunahan kutob sa buwan sa Hunyo, dili kahibudngan nga adunay modiskarte pagpamaligya’g bakuna. Kurapsyon ang gidudahan nga hinungdan sa kalangan. Sa pamahayag ni Secretary Duque, daw nahimug-atan ang pagya nga nag-awhag nga “Ihunong ang kurapsyon….kay gikasilagan sa gobyerno ang kompetisyon” Pagkatoytoy!

Nayab-an og tubig

Mipasaka si Senador Angara og balaodnon nga magpahigayon sa libre’ng tinuig nga medical checkup sa tanan sa tuyo nga masayran ug matambalan gilayon ang tawo pagsugod pa lang sa iyang balatian. Ang mga laboratory ug diagnostic examinations pagadumalahon sa PhilHealth accredited nga mga institusyon Maanindot ang tumong sa balaodnon apan nahingawa ang akong amigo’ng pilosopo kay nalambigit na man usab sa programa ang PhilHealth. Alang kaniya, sama unta sa lami-an’g sud-an ang maong balaodnon apan sa dihang hukaron na, nayab-an og daghang tubig maong nalasaw. Atala lagee!