EDITORYAL - Pagpamakuna sa senior citizens

Sa kadaghan sa mga rehistradong senior citizens sa Dakbayan sa Sugbo, pipila pa lamang ang nagpabakuna batok sa Covid-19 o mipadayag og interes nga magpabakuna. Hain naman diay ang uban?

Ang siyudad nagpahigayon aning pagpamakuna sa tulo ka mga piniling vaccination sites aron mapasayon kanila ang pagpabakuna. Ang mga senior citizens nasakop sa Priority Eligible A2 sunod sa mga frontline health services o medical frontliners.  Sayod naman tanan nganong nag-una sa listahan sa prayoridad ang mga health workers tungod sa klase sa ilang trabaho.

Samtang ang mga seniors dili na sama kapiskay ug kalig-on ang panglawas kun itandi sa mga mas bata pa kanila mao nga peligro kaayo kun sila mataptan sa maong sakit, rason nganong ikaduha sila sa prayoridad.

Ning bag-ohay lang, gipahibalo sa Cebu  City Health Department nga niabot na og 7 mil ka mga senior citizens sa siyudad ang nakadawat na sa ilang unang dose sa Covid-19 vaccine. Kadaghanan sa gigamit nga bakuna sa siyudad mao ang Sinovac gikan sa China, sunod ang Astrazeneca gikan sa Britanya ug ning uwahi ang Sputnik V nga gikan sa Russia. Kining tanan ubos pa gihapon sa gitawag nga clinical trial.

Bisan hinuon sa kagamay sa turnout sa mga nagpabakuna, makapahimuot gihapon kini apan makita nga kuwang pa gyud ilang kampanya aron mas daghan ang makombinsir magpabakuna.

Ang siyudad adunay gibanabanang dul-an na sa 90 mil ka mga senior citizens karon apan kapin pa sa 30 mil na niini ang nagpalista bahin sa vaccination rollout sa siyudad. Apan ang aktwal nga nipadayag og interes nga magpabakuna pinaagi sa online registration wala pa katunga (30 mil pa lang) sa aktwal nga gidaghanon sa mga senior citizens sa siyudad.

Gawas sa mga seniors nga nakapabakuna na, duna pay uban nga wala pa makaparehistro online tungod sa nagkalain-laing rason.

Apil sab niini kadtong mga seniors nga dili na makasugakod sa pag-adto sa vaccination sites tungod sa katiguwangon, masakiton, walay makahatud-kuha kanila. Unsaon man ni sila pagbakuna?

Laing pangutana, tungod dili man ni pugsanay ang pagpabakuna unsa nga pagpangandam ang gihimo sa siyudad kay kining mga dili magpabakuna kuyaw man gyud matakdan sa Covid-19.