Atensiyon seniors!

Nasayod ko nga daghang senior citizens ang mobasa sa atong lindog, mao nga hatagan ko kamo og kasayoran kabahin sa inyong kubrahonon nga cash assistance gikan sa Cebu City government.

Tag P3,000 ang ihatag sa Cebu City government ngadto sa matag senior citizen nga accredited sa Office of the Senior Citizens Affairs (OSCA), para kini sa buwan sa Enero, Pebrero ug Marso.

Sa 84,000 ka senior citizens dinhi sa siyudad nga accredited sa OSCA alang sa cash assistance, kapin pa lang sa 15,000 ang nahatagan og cash cards gikan sa Land Bank of the Philippines.

Ug daghan sa maong mga senior citizens nga nahatagan na sa ilang cash cards wa pa gihapon makapa-activate sa ilang ATM didto sa Land Bank. Ang panahon nga gihatag kanila mi-expire na.

Dunay gamay’ng problema niini kay ang ilang cash assistance adto ra ba ipaagi sa cash cards. Ang inyong buhaton mao ang pag-adto dayon sa opisina sa OSCA sa City Hall aron hatagan mo og endorsement, ug maoy dad-on ninyo sa Land Bank aron makapa-activate mo.

Apan kadtong dili makahigayon ug wa magkinahanglan og kwarta, ayaw lang kabalaka kay ang inyong cash assistance anaa ra sa inyong cash cards ug makuha ra kini kon makapa-activate na mo.

* * *

Gibutyag ni Cebu City Councilor Raymond Alvin Garcia nga dayonon gyud kuno ang pagbayloay og yuta sa Cebu City ug Cebu Provincial governments aron dili mapapahawa ang mga nagpuyo sa 93-1 Lots.

Nindot nga lakang sa mga opisyal sa Cebu City, kay kon dili nila kini trabahoon, mahimong mahiubos kanila ang kapin sa 5,000 ka pamilya nga nagpuyo karon sa mao nga luna.

Kon ibutang nato nga ang kada pamilya dunay upat ka botante, mahimong ang mga opisyal karon, basin og maibanan og mga 20,000 botos atol sa eleksyon karong sunod tuig.

Mao nga tukma kaayo ang lakang nga maninguha gyud ang administrasyon ni Mayor Edgardo Labella nga madayon ang land swap.

Unya, ang sunod nga isyu kon pila ang kantidad sa yuta nga pabayran sa mga nag-ukopar niini.

Dili man gyud unta magkaproblema ba kon wa pa magpagahi-gahi ang maong mga pamilya diha nga gibaligya kini sa Kapitolyo kaniadto pinaagi sa Provincial Ordinance 93-1.

Unsaon man, daghan kaayong mga nagpuyo sa 93-1 Lots nga wa gani gyud mobayad bisan “usa ka sentimo” sa yuta nga giukbokan nila sa ilang balay.

Alang sa mga wa masayod, ang yuta sa Kapitolyo nga “covered” sa 93-1 Lots, nahimutang sa 11 ka barangay dinhi sa siyudad.

Kon hatagan gani mo og laing higayon pagpalit sa maong luna, siguroa na gyud ninyo ang pagbayad.