Suluan ang tago nga paraiso sa Guiuan

Duha ka Isla sa lungsod sa Guiuan ang akong nataak nga mao ang Suluan ug ang Homonhon, parehong nagdala sa dakong papel sa kasaysayan dili lang sa nasud kon dili sa tibook kalibotan.

Dinhi man ang unang nasum-okan sa Magellan Elcano Expedition niadtong 1521, 500 years ang nakalabay kinsa gipakitaan sa mga lumad og maayong gawi kinsa wala magpanuko sa pagtabang sa mga langyaw.

Gitawag kini nga Humanity and Victory karon nga kasaulogan sa mga Guiuanons tungod kay mipatigbabaw man ang kalumo sa kasing kasing nila.

Ang naasoy’ng mithi hangtod karon gibatonan sa mga tawo nga maoy akong naobserbahan atol sa akong pagbisita sa dapit. Nihaum ra sa makabibihag nga paraiso sa dapit, nindot kaayo ang talan-awon sa puti ug pino nga bas sa baybayon.

Unang giadto nako ang Suluan diin upat ka oras ang biyahe sa pumpboat, apan makahingangha ka sa pag-abot kay mosugat ang puti nga bas sa baybayon ug blue usab kaayo ang dagat. Simple kaayo ang kinabuhi sa mga tawo, ang ilang pamatasan daw mauwawon apan maantigo sa ilang panginabuhi. Pangisda ug pangopras sa lubi ang ilang livelihood. Duna silay kuryente apan panahon sa kagabhion pang suga lang.

Ang uban tubig motubod ra usab nga maoy ilang imnonon, samtang duna silay kaugalingong eskwelahan. Sa komunikasyon naa usab silay signal, hinuon dili man kusog apan igo na nga makapadangat sila sa gusto nilang ipaabot nga kasayoran. Dako kaayo nga potential isip major tourist destination ang naasoy’ng isla apan maayo sa pag-abot sa panahon dili maabusohan.

Hinuon dili pud motugot ang mga Suluanon nga mahisama sa ubang dapit ang ilang matahom nga isla.

Karon nga pandemic pa sirado una kini sa mga bisita. Nindot sud-ongon ang dapit nga wala pa kaayo madiskobrehi nga nagpabilin gihapon ang lama sa kasaysayan.

Sila ang mga Suluanon sa Guiuan, Filipino nga ikapasegarbo dili lang sa katahom sa dapit kon dili sa kinaiya sa mga tawo.

Kini ang hiyas sa paraiso nga apil sa sentro sa kasaulogan sa Humanity and Victory!