Carbon Market

Sugod karong Lunes, Marso 22, dili na pasudlan og mga sakyanan ang mga dapit diha sa Carbon Public Market.

Ang tumong kuno niini aron nga dili magkaguliyang ug mapugngan ang panagdasok sa mga tawo nga posibleng mangumpra.

Pero ang akong tan-aw niini, pangandam kini tungod kay mura’g himoon na ang ground breaking ceremony alang sa pagmugna og bag-ong Carbon Market building.

Ang Megawide maoy gitugyanan sa kagamhanan sa Dakbayan sa Sugbo nga motukod sa mao nga moderno kuno nga public market.

Unsay epekto nga did-an ang mga sakyanan pagsulod sa mga karsada diha sa Carbon Market? Daghang mangumpra unta diha sa Carbon nga dili na ganahan.

Aw. Gawas niadtong mangumpra nga magsakay og PUJ, way problema, apan kinahanglan sila nga molakaw pa og layo.

Kon dili kamo gusto nga masamok, ayaw na usab ninyo tuguti nga maka-operate ang mga trisikad kay mao ni ang makadala og samok.

Apan kon dili usab tugotan ang mga trisikad, unsaon man sa mga mamalitay, bitbiton o pas-anon nila ang ilang mga pinalit? O magsalig sila sa karomata?

Nindot man nga dili na pasudlan og mga sakyanan ang mga dapit sa Carbon Market, apan basin baya unya og anha na usab maghimo’g parkinganan sa gawas?

* * *

Ambot og unsa kaha’y sangpotan sa pagsupak sa mga tindera diha sa Carbon niining ilang giingon nga “privatization” sa public market.

Akong nahibaw-an nga nagplano na sila nga modangop sa hukmanan aron mapugngan ang pagtukod sa Megawide sa mao nga proyekto.

Gipasabot ko ni Erwin Gok-ong, chairman sa Cebu Market Vendors Cooperative (CEMVEDCO), nga dili sila supak nga i-modernize ang Carbon Market.

Apan ang ilang gisupak mao nga usa ka pribadong kompaniya maoy tugyanan sa siyudad sa pagtukod og bag-o nga public market kay mosangpot kini nga momahal ang prisyo sa mga baligya unya.

Ang pamaagi nga way gasto ang Cebu City government ug ang Megawide maoy magtukod og moderno nga public market.

Apan sulod sa 50 ka tuig, ang Megawide maoy mangolekta sa abangan gikan sa mga vendors nga maninda. Ubos sa kasabotan, ang 50 ka tuig, mahimo pa gani nga lugwayan og laing 25 ka tuig.

Gitan-aw kini ni Gok-ong nga dili makiangayon, kay anaa sa kasabotan nga ang City Council, kinahanglan gyud nga mo-approve sa kantidad sa abangan nga isugyot sa Oversight Committee sa Carbon Market.

Ang Oversight Committee gilangkoban sa upat ka representante gikan sa Megawide, ug tulo ra gikan sa City Hall. Matud ni Gok-ong nga kon unsay kagustohan sa Megawide, matuman gyud kay sila man ang majority.