Timaan sa taphawng contact tracing
Usa sa mga rason sa pagtidlom sa gidaghanon sa napamatud-an nga bag-ong mga kaso sa COVID-19 sa Sugbo ug Central Visayas sa nangaging mga adlaw mao ang makapahibung nga pagtibugsok sa gidaghanon sa swab tests nga nahimo sa mga laboratoryo sa rehiyon.
Makapahibung nganong nikalit pag-us-os ang swab samples nga nasusi sa mga laboratoryo human sa kadaghan sa bag-ong mga kaso sa gisundan nga mga adlaw. Kon gitarung pa sa pagsubay ang tanang close contacts nga posibleng natakdan sa bag-ong mga pasyente, modaghan unta ug di momenos ang swab tests.
* * *
Nitaho ang Department of Health (DOH) nga niadtong Dominggo, Marso 14, 2021, nakasusi og 1,766 ka swab samples ang ilang accredited nga molecular laboratories sa Sugbo, Bohol ug Negros Oriental. 275 o 15.57% ang positibo.
Samtang niadtong Biyernes, Marso 12, nakasusi ang mga laboratoryo og 4,244 ka swab samples nga 511 o 12.04% ang positibo. Sa kadaghan sa bag-ong kaso niadtong Biyernes, nganong naibanan man ang swab tests pagka Sabado (2,768 o 65.22%) ug nisamot pa pagka Dominggo nga 41.61% na lang?
* * *
Kon agresibo pa lang unta ang contact tracing, nga segun sa DOH kinahanglan nga hangtod sa 36 ka close contacts sa kada bag-ong pasyente ang angay nga masubay, mas daghan pa gyod unta sa 4,244 ang swab samples nga nasusi sa mga laboratoryo niadtong weekend.
Nikumpisal ang DOH nga bisan sa Metro Manila, diin nagtapok ang kinadaghanang contact tracers, unom ra ka close contacts kada bag-ong pasyente ang nasubay. Mas mingaw pa gyod tingaling labok sa Sugbo ug ubang probinsiya.
* * *
Niangkon nang Malakanyang nga, usa ka tuig na human sa pagpahamtang sa kinatas-an nga lockdown sa tibuok kalibotan, ang contact tracing nagpabilin nga kinadak-ang buslot sa kampanya pagkontrolar sa tinakdanay sa Covid-19.
Hinaut nga di lang sila kutob sa pag-angkon sa kasaypanan. Hinaut nga di maabtan og laing tuig una matarung ang kampanya pagpanalipod sa mga Pilipinhon gikan sa pandemya. Kay kon pasagdan nga kuwang ang contact tracing, motibugsok sab ang swab testing, ug di dayon matultolan ang tanang posible nga nataptan sa kagaw hangtod nga makapanakod sila sa mas daghan pa.
* * *
- Latest
