Kinsa kaha’y maayo?

Nakabantay ko nga kanunay na nga mosuroy si Senador Bong Go sa lainlaing dapit sa nasud, aw, sagad hinuon iyang kauban si Presidente Duterte.

Tungod niini, may nagtuo nga ang senador dunay tinguha nga molansar og mas taas pa nga pwesto, sama sa pagka bise presidente, o kaha presidente gyud.

Gani, diha’y higayon nga nangomedya si Presidente Duterte nga kuno, si Go dunay tinguha nga modagan sa labing taas nga pwesto sa kagamhanan.

Sa akong bahin, dili pa ko makakumentaryo niini kay ang anak ni Presidente Duterte nga si Davao City Mayor Sarah Duterte-Carpio, gituohan sab nga modagan.

Dili kaha maglibog si Presidente Duterte kon hain sa iyang anak ug suod nga amigo ang iyang suportahan?

Pero, si gidayeg gyud nako Go kay ang paghatag og pag-atiman sa panglawas sa katawhan usa gyud sa iyang prayoridad.

Ang uban sab gusto nga si Senador Manny Pacquiao maoy mahimong sunod nga presidente. Ambot og usa ba kini sa iyang plano, ilabi na nga presidente na siya sa partido PDP-Laban.

Nakasiguro ko nga karong pipila ka adlaw, daghan pa nga mga ngalan ang motumaw nga posibleng magplano sa pagpapili pagka presidente ug bise presidente.

Apan ang kulbahinam gyud dinhi sa ato mao kon kinsa ang moatbang ni Mayor Edgardo Labella dinhi sa dakbayan sa Sugbo.

Daghan ang nagpangutana kon si kanhi mayor Tomas Osmeña molansar pa ba kaha batok kang Labella.

Si Vice Mayor Mike Rama hinuon, tan-aw nako, kon dili kini magpasubli ra pagbalik sa iyang pwesto karon, basin og adto siya sa pagka kongresista sa south district.

Kay kon si Rama molansar usab pagka mayor, dili gyud maayo ang resulta kay ang botos sa ilang mga dumadapig, mabahin man.

Kon kini mahitabo, hayahay kaayo ang kandidato pagka mayor sa Bando Osmeña Pundok-Kauswagan (BOPK), mao nga angay’ng magsabot gyud sila si Labella ug Rama kabahin niini.

Sa Mandaue City hinuon, aw, mora’g “hayahay pa sa manikop” si Mayor Jonas Cortes kay wa siya’y lig-ong kaatbang.

Pwerteng lisura pildehon ni Jonas tungod kay maayo kaayo niya pagkadumala ang Mandaue City. Unya, kauban pa gyud sila si Kongresista Lolypop Ouano-Dizon nga lig-on sab kaayo sa Mandaue City lone district.

Sa first congressional district sa Sugbo hinuon, aw, way makapilde ni Eddie Gullas uy, kay bisan og edaran na, gipangga gihapon sa katawhan.

Ang Talisay City sab, maayo kaayong pagkadumala sa batan-on nga si Mayor Samsam Gullas. Sa Lapu-Lapu City, mora’g milig-on sab si Mayor Ahong Chan, kay daghan sab kaayo og mga proyekto.

Buyno, atangan nato ang kalamboan sa politika!