EDITORYAL - Lockdowns dili solusyon

Mura og dili maayo ang pagdawat sa mga Sugboanon sa ideyang ibalik ang Sugbo sa lockdown o sa general community quarantine nunot sa padayong pagsaka karon sa mga kaso sa coronavirus disease nga nakapaalarma sa  mga otoridad didto sa Manila.

Una nang nipadayag og pagsupak si Gob. Gwendolyn Garcia sa maong posibilidad tungod kay daghan na sab mga balay-patigayon nga mapugos sa pagpanirado, daghan ang mawad-an og trabaho ug makulban na sab og kaldero.

Kun mag-lockdown man gud ang bugtong makaluluoy mao gyud ang mga yanong tawo dili ang mga adunahan o kadtong mga naa sa posisyon o otoridad. Kaning mawagtangan og trabaho kinsa may mopakaon kanila ug sa ilang pamilya, ang gobiyerno? Kaning pagsaka sa mga kaso karong tuiga dili mahimong ibasol lang ngadto sa mga tawo tungod kay dako sab og papel ang gobiyerno.

Kung wala pa lang unta nila giluagan ang mga restriksyon sugod adtong bulan sa Disyembre unya gipadayon sa mga barangay ug sa kapolisan ang seryusong pagpatrolya ug pagpamadlong ug pagsikop sa mga quarantine violators bisan giluagan pa ang restriksyon dili ni maingon niini.

Kaning lockdowns dili makaayo sa tanan, mao nga kutob sa mahimo dili na unta kini balikon pa sa pagpatuman tungod kay pagan gyud ang tanan.

Mahimong ipaagi nalang sa granular lockdowns kung diin kompirmado gyud nga naa ana nga partikular nga balay, sitio, barangay, establisamento o kompanya ang daghang kaso sa COVID-19.

Ang maayong buhaton mao ang pagtuon sa tanan kauban ang mga lokal nga kagamhanan ug otoridad sa dugay ng gisigehan og hisgot nga “new normal” nga pamaagi sa pagpuyo sa mga tawo.

Normal ra gyud nga dunay mga tawong badlungon ug gahi gyud pasundon, mao bitaw nga kinahanglan tinud-on sa mga law enforcement units ug barangay officials ang pagpasunod gyud sa mga health protocols, way lugak-lugak.

Dili matawag nga new normal kining lockdown kay daw kini dili makatarunganong pagpahamtang og silot sa tanan ilabi na niadtong mga nanarbaho ug nagtinarong pagsunod sa mga health protocols.