Local mutation sa virus

Ako na kining nalakbitan sa niagi nakong lindog ang posibilidad nga mag-mutate locally ang virus. Kong anaay UK strain posibleng anaay Cebu or Philippine strain.

Mao kini ang nahisgotan namo ni Dr. Mary Jean Loreche, spokesperson sa Department of Health sa Region 7 niadtong nakalabayng adlaw.

Nabalaka kaayo kita nga basin nakasulod na ang UK strain apan wala kita makaseguro nga naa na diay local mutation diri sa atoa.

Sumala ni Dr. Loreche nga gitutokan nila kini karon isip proactive measure ug nga mopahigayon sila og bio-survielance sa mga nataptan sa virus karon.

Sa higayon nga makakuha na sila og pagtugot sa ilang lakang, sugdan dayon nila ang pagkuha og sample diin target nila ang mga bata kay naobserbahan nga daghang bata ang nataptan sa virus ug mao usab kini ang nakatakod sa ubang mga miyembro sa pamilya.

Laing target mao ang clustering diin daghang miyembro sa pamilya ang nataptan sa virus.

Ang ikatulo mao ang mga nangaayo na unta sa COVID-19 apan nataptan og balik or gitawag nga reinfected sa virus.

Sa higayon nga makuhaan na nila og sample ipadala dayon didto sa Philippine Genome Center alang sa Genomic sequencing aron masuta kon unsa nga matang sa virus ang ni exist karon.

Gipadayag sa health expert nga kinaiya sa virus ang mag-mutate ilabi na kon magsige na kini og taboktabok sa pagtakod sa mga tawo.

Hilabihan ka paspas ang pagkuyanap sa virus karon ug dili na kini matawag nga tungod sa holiday season kay dugay naman to nahuman nilapas na ang incubation period.

Maayo nga masayran unsay nahitabo karon taliwala sa pagduda nga ang UK variant ang anaa karon sa palibot maong paspas kaayo ang transmission or naay local mutation.

Ma naa o walay virus mutation, ang klaro kaayo nga nahitabo karon mao ang sobrang kumpiyansa sa mga tawo.

Gani ang uban dili naman motuo nga naay COVID-19, sawayon pa ang mga opisyal sa gobiyerno ug ang media nga magbalita niini.

Seguro motuo sila kong simbako sila makasinati sa balatian, hilabihan ra gyud intawon ka mahal kining sakita.

Mahimo ra man nga molihok kita apan tamdan nato ang mga health protocols.

Dili kita magpa-hostage sa atong kahadlok sa COVID-19 maong maningkamot kita aron dunay ikabuhi sa atong pamilya.

Busa magkat-on kita nga magpuyo sa bag-ong normal nga naa si COVID.

Apan kat-onan nato ang pagmugna og proteksiyon sa atong kaugalingon nga mao ang basic protocol nga dili angayan kalimtan.