Immersion

Enero 10,2021: Pangilin sa pagbunyag sa atong Ginoo

Mga Pagbasa: Is. 42; 1-4,6-7/Sal. 29/Buh. 10;34-38/1 Jn. 5;1-9/Mk. 1;7-11

Kini ang pulong nga among nadunggan kaniadto niadtong nagtungha pa ko sa seminaryo. Kasagaran anaa gyud ang immersion sama ning mga mosunod:

1. Pastoral Immersion diin kami madestino sa parokya aron sa ingon mamamahimo kaming ma-expose sa mga bulohaton niini. Matag adlaw nga Sabado gyud kami moadto.

2. Fishing immersion panahon sa SPFY diin makigkuyog kami sa mga mananagat.

3. Farming Immersion panahon gihapon sa SPFY diin maghimo kami og panguma kuyog sa mga mag-uuma.

4. Job Immersion panahon gihapon sa SPFYdiin mohimo kami og pagtrabaho isip mga janitor. Kaniadto nahimo akong janitor sa Chowing Colon, Colegio de Sto. Nino ug sa Boss Coffee Capitol. Yano ra gyud ang kinabuhi sa janitor kaniadto.

5. Mission Immersion niadtong bag-o pa kong pari sa dihang nadestino ako nga Mission Priest didto sa Carnaza isla sa Daanbantayan. Kun buot hunahunaon daghan na ko og naagian. Kun maghisgot kita og pulong baptism gikan kini sa pulong baptisma nga nagpasabot og immersion kun pagtunlob.

Sa dihang ang atong Ginoo gibunyagan nahimo siyang nitunlob diha sa atong makaluluoy nga kahimtang sa sala. Wala kini magpasabot nga siya masalaypon ni siya ulipon sa sala. Hinunoa ang maong bunyag pahinumdom lamang sa dakong gugma niya nga tungod niini nahimo siyang kabahin sa atong kinabuhing tawhanon aron kita mismo mamahimong kabahin usab sa iyang kinabuhing Diosnon.

Sa laing bahin, ang bunyag niya maoy nibalaan sa tubig pinaagi kaniya nga gibunyagan. Ang maong tubig nga gigamit sa atong bunyag maoy nakapahimo natong nahugasan gikan sa salang panulondon diin kita nahimong namantsahan. Sa dihang kita gidihogan gihimo kitang lain ug pinihig alang sa katuyoan nga iya sa Dios. Mahimo nato ang atong pagpadayag sa bili sa sakramento nga atong nadawat pinaagi sa pagpuyo sa tutulo ka mga kinaiya ni Kristo nga naglangkob ning mosunod:

1. Pagkapari pinaagi sa kinabuhi sa ampo.

2. Pagkahari pinaagi sa kinabuhi sa pagpangalagad

3. Pagkapropeta pinaagi sa pagsangyaw sa bisan unsang makaayo ug dili ang makadaut sa kadaghanan.

Ang immersion ning panahon sa pandemiya wala naman magkinahanglan nga kita anaa gyud mismo sa mga tawong atong gialagaran agi’g pagbantay pud sa atong tagsa tagsa ka mga seguridad labina ning virus nga kanato karon naghasi. Ang mahinungdanon anaa ang tinguha sa sulod mismo sa tagsatagsa ka mga kasingkasing aron sa ingon makatabang kita sa usag-usa. Hinaut pa unta.

Diin nahimong kabahin sa atong kinabuhi ang pagsulod sa ganghaan sa bag-ong kinabuhi diha ni Kristo ug ang pagtak-op sa ganghaan sa atong kinabuhi sa sala.

* * *

P.S. Salamat diay sa tanang greetings sa akong nilabay nga birthday niadtong Enero 7, 2021 Ang Dios na lay mobawos sa inyong pagpakabana.