Ang estado sa druga (Kataposan)

Usa sa mga kalampusan ang pagtahan sa 1.4 milyones ka mga adik nga nagpaubos sa ilang kaugalingon sa rehabilitasyon sa mga reformation ug rehabilitation centers nga gipabarog sa PDEA lukop nasud.

Mokabat usab sa 3,254 ka mga bata nga nalambigit sa gidili nga drugas ang naluwas sa mga awtoridad diin 1,817 tigpayuhot, 385 tiggamitan ug 161 mga bisita sa mga drug den.

Sa 42,045 usab ka mga barangay lukop nasud, 19,876 na niini ang wala nay drugas samtang anaa pa sa 14,491 ka mga barangay ang may suliran pa sa drugas.

Mikabat usab sa P52.77 bilyones o $1.08 bilyones ang balor sa nasakmit nga drugas.

Nabungkag sa mga law enforcers ang 581 ka mga drug dens ug 16 ka mga tago nga laboratoryo. Sa katungang bahin sa tuig 2020 bisan sa COVID-19 pandemic, ang PDEA ug ubang enforcement agencies ang nakahimo og 173,343 ka mga anti-drig operation.

Sa maong gidaghanon mokabat sa 251,889 ka mga tawo and nadakpan diin 9,706 niini mga high-value target nga gilangkoban sa 279 ka mga langyaw, 336 piniling opisyal, 96 uniformed personnel, 40 government employees, 2, 835 listed target individuals, 741 drug group leaders/ members, 62 sakop sa armadong grupo, 947 drug den maintainers, 222 anaa sa pinangita sa balaud ug 11 ka mga inila nga personalidad.

Moabot usab sa 3,776 ka mga tawo ang nadakpan atol sa mga high impact anti-illegal drug operations samtang 5,810 ang mga napatay diin gihimoan og imbestigasyon ang ilang kamatayon.

Sa 4,708 ka mga imbestigasyon sa kapolisan 3,401 na ang girekomendar ngadto sa hepe sa PNP aron mapahamtangan og silot. Sa tuig 2018, miabot sa 42,024 sa 42,045 ka mga barangay lukop nasud ang miumol sa Barangay Anti-Drug Abuse Councils.

Kining maong datus, nga nakuha nato gikan ni Anna Malindug-Uy nga namantala sa The Asean Post, maghatag unta og kadasig sa matag usa sa dugang pagpakabana sa gidili nga drugas. Apan ang pagpakabana kinahanglan kining ubanan og lihok aron mamahimong epektibo.