Happy New Year!

Alang kanatong mga senior citizen, ilabina niadtong nilapas na’g 70 ang edad, ambot  pila na bag-ong tuig ang nilabay sa atong mga kinabuhi. Sa ato pa, kining atong pagsugat ug pagsaulog sa New Year’s Eve, dili kini bag-o alang kanato, nothing new.

Usahay dili kaayo kita ganahan maghunauna sa bag-ong tuig tungod kay magkahulogan man kini og dugang tuig sa atong panuigon. One year older. Sa ato pa, og 75 na ikaw karon, mag-76 na unya ka ugma.

On the other hand, daku ang atong pagpasalamat sa Kahitas-an, nga gilugwayan na usab og laing tuig ang atong kinabuhi. Additional bunos na usab kini alang kanato. Meaning, angay kitang maglipay. Lain na usab nga tuig ang atong pagpaabot sa financial assistance gikan sa City Hall.

Yes, Virginia, Bag-ong Tuig na usab. Apan, sa daghang bag-ong tuig nga atong nasinati, unsa may mga bag-o sa nanglabay nga mga tuig? Nakahimo ba kini’g bag-o sa atong kinabuhi, ilabina sa sa atong mga batasan?

Aron magmakahuloganon ang bag-ong tuig, kinahanglan makahimo usab kini’g something o anything new sa atong kinabuhi, otherwise, kon ang kalendaryo ray mabag-o sa tuig, nan, there’s no reason to be happy at all.

Pananglitan, atong hinumdoman nga sa atong panahon, at least sa among tunghaan sa elementary ug high school, ang St. Alphonsus Catholic School (SACS), gidumala sa mga Benedictine Sisters, pahimuon mi’g  New Year’s resolution sa among magtutudlo sa Religion, diin, sa among bahin, paningkamotan g’yud namo pagtuman.

Tuyo niini mao nga sa pagbag-o sa tuig, makahimo usab kami og kabag-ohan sa among kinabuhi. Lisod ning tumanon. Sagad mahitabo, mo-backslide g’yud ngadto sa naandan nga dautang kinaiya, sama sa pagkabadlongon, pagkiat-kiat … pagka-naughty. Apan ginagmay lang nga mga imperfections, kay wala pa sa atong panahon ang drug addiction ug extra-judicial killing.

At least, ang paghimo’g New Year’s resolution  nakahatag kanato’g higayon paghimo’g accounting ug balance sheet sa atong kinabuhi … how good or how bad have we been the last year, ug paghimo’g adjusting entries kon dunay na-recorded nga mga spurious transactions.

Wala na kini karon. Obsolete, kinaraan ug passé na ang paghimog New Year’s resolution. Wala nay relasyon ang bag-ong tuig sa atong kinabuhi. Wala nay kahulogan.

At any rate, whatever, Happy New Year kanatong tanan. Ug ayaw kalimot pagpasalamat sa Tag-iya sa atong kinabuhi sa laing tuig nga gihatag nganhi kanato.  At least,magpasalamat  kita sa Kahitas-an nga miabot na usab kita sa laing bag-ong tuig, ug gilugwayan na usab og laing tuig ang atong kinabuhi. Sa ako nang giingon, bonus na kini nga tuig. So, welcome 2021. Dako ang atong pasalamat ug dako ang atong mga panghinaut nga makalingkawas na kita gikan sa mga masakit nga panghitabo nga gidalit kanato sa tuig 2020.

Ang Internet nagkanayon: “Wave Goodbye to 2020: What’s in store for 2021?” Ikaw, unsa may imong mga expectations sa bag-ong tuig? Ikaw nay bahala sa imong kaugalingon. Will 2021 bring you happiness, o magpadayon ang mga pag-antus nga imong gihambin sa tuig 2020?

Despite sa pandemic, hinaut nga nagmalipayon kamo uban sa tanang sakop sa panimalay pagsaulog sa New Year’s Eve.