Ulipon kita sa amotan

Mipahibawo ang PhilHealth nga adunay usbaw sa bayranan sa premium ang matag miyembro sa sunod tuig. Tumong sa pag-usbaw ang pagseguro nga adunay igo’ng pundo ang ahensya pagtubag sa mga benepisyo sa mga miyembro.  Baniog ang giingon nga pagkahanaw sa 15 bilyones ka pesos nga pundo sa PhilHealth gumikan sa pagpangawkaw. Apan ni’ng laraw sa PhilHealth, “modukô na lang og magpa-a lot” ang mga miyembro.  Haum ang panultihon nga “Ang pagbayad og buhis (amotan) ngadto sa limbongan o kurap nga kagamhanan wala maghimo sa katawhan nga Lungsodnon, kon dili naghimo kanila nga Ulipon”.  Fezteleern!

Sama sa baki sa atabay

Reklamo karon sa mga jeeney drivers ang kalisod sa panginabuhi tungod sa COVID-19 pandemic, nga misamot pa karon ka hanap tungod sa laraw sa kagamhanan nga i-phase out na ang mga tradisyonal nga pampasaherong sakyanan.  Dugay na man ang laraw sa gobyerno nga modernisasyon sa mga pampublikong sakyanan nga gitumong sa kahapsay ug kaluwas sa mga pasahero.  Sama sa baki sulod sa atabay, wala makita sa mga drayber ang kahamugaway sa lawod sa tingusbawan.  Lang-og ang tubig sa lim-aw kon dili kini lahogayon. Abante na ta!

Kasina gumikan sa kahingawa?

Nahingawa ang mga doktor nga sakop sa Philippine College of Physicians sa gikataho nga pagpabakuna sa mga sakop sa PSG batok sa COVID-19 tungod kay wala pa’y pagtugot gikan sa FDA ang maong bakuna ug wala kini mahisubay sa nalatid nga regulatory processes. Libre ang maong bakuna nga gidapat sa taga-PSG. Dili kaha kasina ang nagtukmod sa mga doktor ni’ng ila kunohay nga kahingawa? Ginaingon baya nga “Ang kasina usa ka matang sa kasilag nga nahimugso gikan sa kahingawa”. Pag-chure mo uy!

Pailob, paabota lang

Sa may kalambigitang balita, nasagmuyo usab ang mga health workers ug senior citizens pagkasayod nila nga naunhan sila sa mga sakop sa PSG sa pagpabakuna batok sa COVID-19.  Alang kanila, sila ang angay hatagan og prayoridad tungod sa risgo nga gi-atubang.  Nag-ilogay na kita kon kinsa ang una’ng mabakunahan.  Nalimot kita sa panultihon nga “Sa ganghaan sa pa-ilob, walay panag-ilogay”. Ginaingon usab nga “Ang pagpa-ilob dili lamang abilidad sa pagpaabot kon dili hiyas sa pagbaton og maayong kabubot-on samtang nagpaabot”.  Huwat lang!

Lusot gihapon ang kabaw

Matud pa ni Atty. Edre Olalia, Presidente sa National Union of People’s Lawyer, ang paghingalan ni Presidente Duterte sa mga personalidad nga nahilambigit sa kurapsyon, drugas ug sa komunistang rebelyon nag-hulga sa integridad sa sistema sa hustisya sa nasud ingon man nakaguba sa kadungganan sa hingtungdan. Bisan mapagaw pa ang Presidente pagpasangil, sayod kita nga dili mahitabo ang gipadayag sa NUPL. Labaw na nga walay moluwat sa ilang katungdanan sa mga gihinganlan.  Lusot gihapon ang kabaw sa lawa-lawa. Saoonz!