EDITORYAL - Paghigpit og balik gikinahanglan

Nausab gyud ang klase sa pagselebrar sa katawhan sa kapaskohan karong tuiga tungod sa pandemiya. Ang kaniadto sobra-sobra nga kasadya sa palibot napulihan og mingaw kadalanan.

Kini bisan pa og dunay konsiderasyong gipatuman ang nagkadaiyang lokal nga mga kagamhanan aron makaselebrar ang mga tawo sa Pasko nga dili kaayo tantong daw gitanggong sila sa panimalay.

Karong mahuman na ang tulumanon sa mga tawo sa kapaskohan, ilabi na sa Misa de Gallo ug Simbang Gabi nga diin mi-adjust gyud ang mga opisyales sa mga local government units aron hatagan og kahigayonan ang mga tawo nga makasimba.

Ang pag-adjust gihimo pinaagi sa pag-usab sa curfew ug ang pagkanselar sa quarantine passes. Aron ang mga tawo nga naa sa edad nga gitugotang makagawas 15-anyos hangtud 65 –anyos makasimba bisan wa silay dalang quarantine passes.

Gihimo kini nga dunay pagdiki-diki gumikan kay wala pa gyud mawala ang hulga sa coronavirus. Mao nga higpit sab ang mga gipasunod nga mga health protocols diha sa mga simbahan atol maong mga relihiyosong kalihokan.

Karon nga nahuman na kini, maayo lang gyud nga ibalik og estrikto ang paglihok-lihok sa mga tawo. Sama sa pagpabalik sa paggamit sa quarantine passes ug ang curfew.

Kini tungod kay kun dili higpitan siguro gyung magpaturagas lang og laag ang mga tawo bisan dili importante ang ilang mga lakaw.

Daghan sab unya ang ma-expose na hinuon sa coronavirus tungod niini ug peligrong maproblema nasab ang kapasidad ug kapabilidad sa healthcare system nagkadaiyang mga lugar.

Wala pay nakitang kausaban sa gidaghanon sa mga bag-ong natalang kaso sa nakalabay nga pagsaulog sa Pasko gikan sa pagsugod sa Misa de Gallo. Apan mipasalig hinuon ang Department of Health nga ilaha na kining gipangandaman nang daan kung unsay resulta.

Sa panahon karon, mosugot man o dili, kinahanglang mosabot ang publiko sa mga gihimong lakang sa gobiyerno hangtud nga wala pay bakunang makapugong o makaprotektar sa coronavirus pagtakod sa tawo.