EDITORYAL - Way kwestyon sa debosyon

Daghang nagyawyaw ug namiay-biay sa mga tigbalita nga nagkuha og mga hulagway sa  sitwasyon sa una ug ikaduhang Misa de Gallo nga nagpakitang wala gyud masunod ang health protocols ilabi na ang social distancing sa mga tawong nanimba.

Gawas sa wala masunod ang social distancing, duna pa sab daghang mga batang wala pa kaabot og 15 anyos nga gidala sa mga ginikanan. Samtang duna say uban nga dili simba ang tumong kondili pakigbarkada lang.

Apan inay nga magpasalamat o mabalaka sa sitwasyon, dunay mga netizens nga wala sa lugar kun mokomento ug gitunglo pa hinuon ang photographer nga igo rang naghimo sa ilang trabaho.

Si Mayor Edgardo Labella isip amahan sa dakbayan nakasabot sa mga Sugboanon panahon ning kapaskuhan nga makatambong sa Misa de Gallo kay tradisyon na sa ubang pamilya. Gitugotan niya kini sa kondisyon nga kinahanglang mosunod ang tanan sa health protocols sa sulod ug sa gawas sa mga simbahan.

Ang iyaha lang kutob ra sa paghangyo sa mga tawo nga mahimong responsable pinaagi sa pagsuot og facemask, face shields, pagsunod sa social distancing, likayan ang pagtapok-tapok ug uban pa, dili para kaniya kondili para mismo sa publiko nga iyang gialagaran.

Ang media usa ka mensahero sa hustong impormasyon ngadto sa publiko ug sa mga hingtungdan. Dili para lang makakuha og hulagway kondili mao kini ang ilang trabaho.

Tungod sab sa maong mga hulagway, nakabuhat dayon og dinaliang kausaban ang mga kadagkoan sa simbahan ug ang lokal nga kagamhanan.

Dili para sa ikalipay sa mga nanaway kondili para kini sa ilang kaluwasan nga dili matakboyan sa Covid-19.

Iresponsable ang mga tawong nalimot nga sa makausa ka higayon nahimong epicenter sa Covid-19 ang Cebu City niadtong bulan sa Hunyo hangtud sa bulan sa Hulyo tungod sa pagsaka sa gidaghanon sa mga natakboyan sa maong virus.

Wala gikwestyon sa napatik nga hulagway ang kalig-on sa pagsalig ug pagtuo sa mga deboto, kondili ang ilang kaluwasan. Dili sab tingali mahimuot ang Magbubuhat kun ang mga otoridad sa yuta nga iyang gitahasan dili paminawon sa mga tawo.