EDITORYAL - Pagsugwak sa tawo

Bisan pa sa pandemiya ug mga restriksyong gipatuman sama sa limitadong gidaghanon sa mga makasulod sa simbahan, wala gyud kapugngi nga nagsugwak gihapon sa kadaghan sa manimbahay ang gawas nga bahin sa nagkadaiyang simbahan.

Obserbasyon kining nakita atol sa una ug ikaduhang adlaw sa Misa de Gallo ug Simbang Gabi. Sa sud sa mga wa kaayoy problema tungod kay limitado ra man gyud ang makasulod subay sa 50 percent nga gitugot sa gobiyerno tungod sa pandemiya sa Covid-19.

Ang naglabad ang ulo mao ang mga local government units nga nagbantay diha sa gawas tungod dili gyud kapugngan ang pagabot-abot sa mga tawo. Sa Cebu City, gisuspenso una ang quarantine passes maong di na ikahibulong nganong nisugwak ang mga tawong nanimba.

Samtang tuod og nagsuot sila og facemask ug face shields, lisud kaayo ang pag-mentinar nga masunod ang physical distancing.  Gawas pa, nabantayan sab nga daghan kaayong mga bata nga wala pay mga 15 anyos. Apan ang uban wala gyuy kaubang hamtong o ginikanan sa pagtambong sa misa ug kauban lang ang ilang mga barkada.

Dunay uban gibadlong gyud sa mga polis tungod kay wala motuman sa social distancing ug klaro kaayong dili wali sa misa ang ilang tuyo kundili pakighugoy-hugoy lang kauban lang sa ilang mga barkada.

Ang Inter-Agency Task Force on Emerging Infectious Disease nagtugot lamang sa edad 15 anyos hangtud 65 anyos  sa mga mamahimong makagawas. Kinahanglang sundon kini sa tanan.

Hinuon sama sa mga Misa de Gallo sa nangaging katuigan, maayo lang sa pagsugod kining uban ug samtang magdagan ang siyam ka adlaw nga Misa de Gallo o Simbang Gabi, magkaanam sab ni og kagamay. Lakip sa kapuyan kining mga kabataan kay dili molahutay. Apan ang pangutana, wala kahay magmahay paglabay sa pila ka adlaw niining wala pagtuman sa uban sa minimum health protocols?

Mas maayo tingaling dunay himuong kausaban mahitungod niini ang simbahan ug ang mga LGUs. Iampo sab nga wala ray negatibong epekto kining pagsugwak gihapon sa mga tawo diha sa gawas.