EDITORYAL - Face shields dugang proteksyon

Mga tawong mogawas ug moadto sa publikong mga lugar gikinahanglan ng magsuot og face shields gawas pa sa gisuot nilang facemask aron mas mapalig-on pa ang proteksyon batok sa coronavirus.

Ang maong kamandoan giingong gikan sa the Inter-Agency Task Force for the Management of Emerging Infectious Diseases. Gituyo kini tungod sa hulga sa pagdaghan sa mga kaso sa Covid-19 ilabi na nga kapaskohan na ug daghan ng mga tawo diha sa gawas. Dili kini angay ikalain sa publiko tungod kay para man sab kini sa ilang proteksyon. Samtang wa pay bakuna batok sa maong sakit, maayong mosanong lang gyud kanunay sa kamndoan sa gobiyerno. Ang face mask dako og natabang, mas madoble pa ang proteksyon kung magsuot og face shields dili lamang kung mosud og malls o kun magsakay og public transport, kondili bisan sa paglakaw-lakaw diha sa aseras diin duna say daghang tawong magbahis-bahis.

Maayong isipon nalang kini sa positibong paagi kay para man sab kini sa kaayohan sa tanan, ilabi na sa pamilya. Mas maayong managana ug sobra ang pagpangandam  nungka sa magkulang kay lisud na og matakdan na ayha pa magsuot og proteksyon kay uwahi na unya ang tanan.

Apan kinahanglang panid-an sa gobiyerno ang presyo sa mga faceshields karon nga gihimo na kining rekisitos. Tungod kay dili kalikayan nga kun mosaka gani ang demand, mokalit sab og mahal ang presyo sa bisan unsang produkto.

Sama nalang sa surgical facemask sa pagsugod sa pandemiya, miabot tag P25 pesos bisan kadtong ordinaryong disposable facemask  matag usa.

Daghang mga bentahosong mga magpapatigayon nga matintal gyud sa pagpaburot sa presyo. Angay silang masanta tungod kay nagdugadugang sila sa kalisdanang nasinati karon sa publiko.