Pagkat-on sa kasaypanan
Dul-an sa tuig sukad sa pag-ulbo sa pandemiya, makatabang sa tanang hingtungdan ang pagsubli ug pagkat-on sa kinadak-an nga kasaypanan nga nahimo sa nagkalainlaing kanasuran sa kalibotan nga inay makaiban nakapasamot na hinuon sa problema.
Nag-una sa listahan mao ang pag-eksperimento sa mga doktor sa bisan unsa nga tambal nga ilang nahunahunaan nga mahimong makatabang sa mga pasyente, labi na sa labing grabe og kahimtang. Wa katabang ang pangangkon sa pipila nila sa ka-epektibo sa mga tambal nga ilang natsambahan, apan human sa mas makuting pagtuon nakaplagan nga way kapuslanan.
* * *
Angay’ng manlipaghong sa kauwaw ug kinasingkasing nga mangayo og pasaylo di lang ang mga doktor kon dili hasta ang Food and Drug Administration (FDA) sa Pilipinas ug sa ubang kanasuran sa dinalidali nila nga pagduso nga epektibo batok sa COVID-19 ang mosunod:
Hydroxychloroquine kansang pagtugot niadtong Marso gibakwi human napamatud-an sa clinical trials nga nakadugang sa gidaghanon sa nangamatay;
Remdesevir nga gitugotan niadtong Mayo apan nakaplagan nga wa makaiban sa gidaghanon sa na-ospital ug nangamatay; ug
Convalescent plasma nga gitugotan niadtong Agosto apan napamatud-an nga wa katabang sa mga pasyente.
* * *
Ang sayop nga pag-ila sa convalescent plasma nga tambal maoy laing ebidensiya nga ang retiradong mga heneral, nga maoy gitugyanan ni Presidente Rodrigo Duterte pagduma sa nasudnong kampanya, way hibangkaagan mahitungod sa tambal.
Kay si Heneral Roy Cimatu ug ubang retiradong heneral maoy nag-una-una og deklarar sa convalescent plasma nga epektibo batok sa COVID-19 pinasikad lang sa usa ka kaso nga gipasigarbo sa pipila ka doktor sa Dakbayan sa Sugbo ngadto sa Inter-Agency Task Force (IATF).
* * *
Labing nauwawan, kadudahan hinuon kon madutlan pa ba, si outgoing US President Donald Trump sa bulilyaso sa hydroxychloroquine nga agresibo niyang gisangyaw sa mga Amerikanhon maong napugos ang FDA sa pagtugot ini, bisan wa pay bisan unsang pagtuon, niadtong Marso.
Manghilam-os sab si Dr. Anthony Fauci, direktor sa National Institute of Allergy and Infectious Diseases, nga maoy nipasalig nga ang remdesevir nakaiban sa mga na-ospital ug nangamatay. Sa tungatunga pa lang sa kalibotanong clinical trials sa World Health Organization (WHO) gitangtang nang daan ang remdesevir sa listahan kay napamatud-ang way nahimo alang sa mga pasyente sa COVID-19.
* * *
- Latest
