EDITORYAL-Krimen sa “ber” months

Giawhag sa kapolisan ang publiko nga magmainabtikon ug magmabinantayon karong mga panahona nga nagsingabot na ang kapaskohan tungod sa pagsaka sa mga krimen.

Karong panahona daghang mga tawo ang manggawas aron mamalit para sa kapaskohan. Kini bisan pa nga aduna pay pandemiya ug bag-ohay palang gyud nabalik ang pagpangabli sa ubang mga balay patigayon.

Apan samtang ang uban naghunahuna og ikadalit sa uban karong Pasko, duna say mga tawong ang hunahuna makapamintaha sa uban pinaagi sa pagpamiktima samtang ang tanan nagkamulo sa pagpamalit. Kaniadto, kun mosud na gani ang “ber” months, sugod Septiyembre hangtud sa Disyembre nabantayan sa kapolisan nga mosaka gyud ang mga petty crimes, mga ginagmay nga mga krimen sama sa pagpanulis, pagpanguot, pangilad, pagpalusot og pekeng kwarta ug uban pa.

Kini tungod kay usahay ang mga tawo dili na kaayo maghunahuna gumikan sa pagdali-dali nga makapamalit. Mas maayong mas mag-amping kadtong mga magdala og salapi sa gawas tungod kay ang mga kawatan nagsugod nasab og katol ang mga kamot ug sama sa uban, naigo sab sila sa pandemiya.

Gumikan sa mga lockdowns ug higpit nga quarantine protocols wala sila makaporma maong wala kaayoy nabalita o nangadakpang mga petty crimes sugod adtong Septiyembre.

Apan karong bulan na sa Disyembre ug miluag-luag na ang restriksyon sa mga tawo, daghan na sab silang mamahimong biktimahon. Mao nga maayong mag-amping ang mga kumprador.

Gikinahanglan sab tingali nga dugangan pa sa kapolisan ang ilang presensya sa kadalanan karon.

Gawas sa pagbantay kun nagsunod ang mga tawo sa health protocols, mabantayan sab nila ang mga krimen ug mapakgang daan kadtong dunay planong maghimo og binuang. Karong umaabot nga Pasko, magmalipayon unta ang tanan ug mag-amping nga dili mataptan sa coronavirus. Moadto lang sa mga malls o mga balay patigayon kun gikinahanglan gyud kay dunay paliton.

Tungod kay dili maayong sugaton ang maong selebrasyon sa tambalanan o ba kaha ma-lockdown ang pamilya sa balay.