Kulang sa timbang

Mipahigayon ang Cebu Market Operations Division og usa ka “bigtime” operation sa Carbon Public Market nga misangpot sa pagkumpiska ug pagpangguba sa mga depektoso, “limbongan” ug wala marehistro nga mga timbangan. Tungod sa kabuang sa mga manindahay, hasta timbangan nahimong “limbongan”. Kinahanglan usab ibutang ang manindahay sa “timbangan sa konsensya ug katarong” aron masuta kon angayan pa ba sila patindahon sa Carbon.  Kon dili makapasar ang manindahay, haum kanila ang ulohan sa lilas nga nagkanayon, “Tinimbang ka Ngunit Kulang”. Hala no!

Daygon sa internet

Gumikan sa sugyot nga idili ang naandan nga pagpanaygon atol sa kasaulogan sa Pasko, miawhag si DILG Secretary Eduardo Año nga ipaagi na lang sa “online” kon internet ang pagpanaygon.  Baniog na si Sec. Año sa mga solusyon nga way hinungdan, kon dili man kataw-anan, sama sa motorcycle barrier ug karon, pagpanaygon pinaagi sa internet. Unsaon man pagpadangat sa awit sa pagdaygon niadtong walay mga internet ug gadget? Unsaon pagdawat sa pinaskohan sa nanaygon nga kabataan? Kon matuman si Sec. Año, inay “Joy to the World”, mahimong “Silent Night” ang atong Pasko.  Daw wala moagi si Sec. Año pagkabata.  Madahaaan!

Parte’ng laaya!!!

Sa may kalambigitan’g balita, miawhag usab ang Department of Health (DOH) sa publiko nga ang pagpahigayon unya sa mga Christmas Party virtual na lang, inay linawas nga panagtapok, aron malikayan ang pagkuyanap sa coronavirus. Ang diwa sa Pasko mao baya ang panag-ambitay ug paghinatagay nga sagad ipahigayon atol sa Christmas Party.  Buot ba sa DOH nga ihikling lang una ang pagsaulog sa diwa sa Pasko? Kon maaprobahan ang maong sugyot sa DOH, mao na’y giingon nga ang atong Christmas Party mahimong “Parteng Laaya”. Fezteleern!

Baligho nga programa

Pinaagi sa gilunsad nga programa sa Department of Agriculture (DA) nga “Cash and Food Subsidy for Farmers and Fisherfolks”, hatagan og ayuda nga kwarta ug pagkaon ang mga dul-an sa 9 mil ka gagmay’ng mag-uuma.  Dili maanindot ang lintunganay sa maong programa.  Kon ang gisaligan sa katawhan nga modulot sa pagkaon sa atong talad-kan-anan, mao na ang hinoon ang hinabangan, adunay dakong baligho sa pangagamhanan.  Dili pagkaon ang gikinahanglan sa mag-uuma kon dili maayong polisiya sa sector sa agrilkultura. DA pagmata!

Kilat Batok Lotto

Segun sa balita, namatay ang usa ka 38-anyos nga lalaking gituohang naigo sa kilat samtang kini nagbiseklita sa hawan nga lugar sa Barangay Ibabao sa Lungsod sa Cordova. Subô palandungon ang maong kamatayon gumikan sa kakalit niini.  Apan pilit na lang dawaton sa hingtungdan ang maong panghitabo, kay lage ang tanan ni’ng kalibutan aduna ma’y katapusan.  Wala lang damha nga pinaagi sa maong kamatayon, napamatud-an na usab ang panultihon nga, “mas dako ang kahigayonan nga maigo ang tawo sa kilat kay sa makadaug sa lotto”. Saoonz!