Rebolusyon

Miyukbo, miangkon ug mibahad si Presidente Rodrigo Roa Duterte nga iyang gamiton ang nahabiling mga tuig sa iyang termino sa pagpahunong sa korapsyon nga iyang giingon nga wala gayud masulbad, hinuon migrabe pa human siya milingkod sa katungdanan isip presidente sa Pilipinas niadtong tuig 2016.

Gihulagway sa Presidente nga inutil ang mga opisyal sa gobyerno ug nahimong makaluluoy kaayo nga tan-awon tungod kay wala gayod kini makapahunong sa korapsyon.

Apan ang Presidente nagtuo nga wala pa siya mapildi. Iyang giingon nga uban sa mga sakop sa iyang gabinite makahimo pa sila sa pagpahunong sa korapsyon.

Tungod niini, gitukod sa Presidente ang Mega Task Force nga pangulohan sa Department of Justice nga maoy mohimo og lapad nga imbestigasyon sa tibuok gobyerno. Ipauna sa Presidente sa pagpaimbestigar ang Department of Public Works and Highways (DPWH).

Ang pagsumpo sa korapsyon sa nasud nga nakagamot na ug nahimo nang kabahin sa kinabuhi sa pipila dili mahimo pinaagi lamang sa pagmugna og mga komisyon o Task Force. Dili usab kini masumpo pinaagi sa pag inisog.

Ang suliran nga nakagamot na kinahanglan ibton. Ang suliran nga nahimo nang kabahin sa kinabuhi sa tawo kinahanglan nga patyon. Busa ang sulbad sa korapsyon, rebolusyon ug dili task force ug komisyon.

Apan ang rebolusyon nga akong gisugyot dili rebolusyon nga gamit ang armas kun dili rebolusyon sa kultura.

Dinhi dako kaayo og papel ang pamilya, tunghaan ug komunidad kay sila ang magtisok og bag-ong binhi sa nasud nga dili lagat ug bokbokon alang sa umaabot.

Dili sayon nga himoon ang rebolusyon sa kultura tungod kay ang pamilya, tunghaan ug komunidad nga atong giingon nga adunay dakong papel sa pagwagtang sa korapsyon nasudlan napod mismo sa korapsyon.

Ang pamilya nagtudlo og korapsyon ngadto sa sakop niini pinaagi sa paghatag og suborno. Ang ginikanan mohatag og suborno sa iyang anak kon duna kini gusto nga ipabuhat. Ang anak mohatag usab og suborno sa ginikanan kon aduna kini pangayoon nga pabor sa anak.

Mao gihapon sa tunghaan ug komunidad may korapsyon. Apan dako gihapon sila og papel sa pagpahunong sa korapsyon.