Love hurts

Grabeha sa nahitabo sa usa ka polis nga nadestino sa Talisay City uy, kay matud pa mipatay kini sa iyang girlfriend, ug dayon pagkahuman, giingong nagpakamatay sab sulod sa iyang opisina.

Ang nakapait kay minyo man ang babaye kay gani ang iyang bana, mireklamo na man kini sa usa ka radioman didto sa Manila aron matabangan siya nga ang iyang asawa gikabit kuno og polis.

Gitawgan gani gyud sa radioman ang police provincial director sa Sugbo kaniadto nga imbestigahon ang reklamo sa bana nga miadto kaniya.

Gitan-aw nako sa hulagway, dili malalis nga hitsuraan ang maong babaye. Para kanako, dakong sayop ang gihimo sa maong polis nga wa gyud malilong kaniya nga minyo ang babaye.

Labaw pa nga sayop ang gihimo sa maong babaye nga nakiglambigit pa siya sa laing lalaki nga unta minyo na man siya.

Ang maong hitabo angay nga kuhaan og leksiyon sa uban kay dakong sayop nga ang usa ka lalaki makiglambigit og babayeng minyo na.

Kon dili ka ipapatay sa bana sa babayeng imong gikalambigit, aw mahimong magpakamatay ka pananglit buwagan ka sa babaye kon ma in-love ka na kaniya.

Ubos sa lagda sa kapolisan, kadtong mga sakop nila nga magpakamatay, dili makadawat sa benepisyo nga para kanila, apan sigurado ko nga tabangan ra ni sa iyang kauban.

Sigurado ko nga ang report nga himoon sa kapolisan niini aron makakubra gihapon og benepisyo ang kabanayan sa polis, ug ingnon ra nila nga aksidente ang hitabo.

* * *

Makapalipay kaayo ang gipagawas nga “figures” sa Department of Health (DOH) nga nagpakita nga mikunhod na gyud ang mga natakboyan og COVID-19 dinhi sa Cebu City, ug ubang mga dapit sa rehiyon.

Base sa labing uwahi nga statistics sa DOH-Central Visayas, duha na lang ka bag-ong kaso sa COVID-19 dinhi sa dakbayan sa Sugbo ug wa nay patay sa milabay’ng mga adlaw.

Gani, giingon nga samtang miabot na tuod og kapin sa 10,000 ka kaso sa COVID-19 dinhi sa siyudad sukad niadtong Pebrero, apan pagkakaron kapin na lang sa 200 ang mga pasyente nga padayong natakboyan sa maong sakit.

Sa ato pa, paingon na gyud tingali nga mahanaw kining maong sakit kon kitang katawhan padayon nga magmatngon nga dili matakboyan pinaagi sa pagsul-ob og facemask kon molakaw.

Apan maayo ba nga karon nga menos na ang kaso sa COVID-19 dinhi sa ato, pabuksan na nato ang mga buwangan? Dili kaha mobalik sa pagkuyanap ang maong sakit?

Mangamatay ba gud ta kon dili pa buksan ang mga buwangan?