PROBE padayon

Akong dayegon ang mga sakop sa Cebu City Hall-Prevention Restoration Order Beautification Enhancement (PROBE) nga nagsugod na sila og guba sa mga illegal structures nga gitukod sa aseras ug karsada sa Barangay Suba dinhi sa siyudad.

Dili angay’ng kaloy-on ang tag-iya sa maong mga structures kay anaa man nila kini gitukod sa aseras, nga ang uban misaylo pa gani sa kanal, unya gitabonan ang kanal sa sawog sa ilang mga tindahan ug gi-tiles pa.

Mao na nga maglunop kon may uwan kay unsaon pag-agi sa tubig nga dili na man malimpyohan ang kanal nga anaa na ilawom sa illegal structures? Daghan kaayo kini diha sa Barangay Suba, ug bisan na sa uban nga mga dapit. Unta, ang mga opisyal sa barangay nga gipangulohan sa akong amigo nga si Kapitan Jojo Sable motabang sa pagpabalik sa naandan nga gidak-on sa karsada. Tabangi friend Jojo ang PROBE kay kaalyado bitaw mo ni Mayor Edgar Labella.

* * *

Diri sa Barangay Kalunasan, bati kaayo ang karsada diha kay utro pa ang mga tag-iya og kabalayan daplin sa karsada nga nangabuso pinaagi sa pagpalapad sa ilang balay ngadto na sa road lot.

Kanang lugar diha dapit sa gamay’ng basketbolan, nag-anam-anam og sibog ang pipila ka tag-iya og balay, hinungdan nga migamay na kaayo ang agianan sa mga sakyanan.

Suheto ko unsa ang gidak-on sa karsada diha kay mag-agian man ko sa Kalunasan sukad pa niadtong 1984. Anha man kuno moagi diha ang pagamugnaon nga karsada nga molusot sa Lahug. Aw, mapalapdan gyud na, apan maayo unta nga madali unta kini paghimo.

Gikuyawan ko nga kon ang mga sinaligan ni Mayor Edgar Labella magdugay-dugay sa ilang mga gimbuhaton, basin og mapupos na lang ang iyang termino ug dili mahatagan og sulbad ang problema sa traffic, baha ug basura.

* * *

Nahingawa ko nga naghunahuna sa kahimtang sa ubay-ubay’ng kawani nga nawad-an og mga trabaho. Tungod sa grabeng problema sa kamingaw sa negosyo karon, daghan na nga mga patigayon ang nanira.

Dunay usa ka karaang kan-anan nga nabantog sa pagluto og mga fried chicken diha sa downtown area ning Dakbayan sa Sugbo, nanirado na gyud kuno kay nakasinati og grabeng alkanse.

Ambot uy, kanus-a kaha tawon mosaka pagbalik ang atong ekonomiya. Mao nga kon dili kita moabag pinaagi sa pagpagamay sa mga kaso sa coronavirus, mosamot pa unya ang problema.

Likayan nato ang paghimo’g mga lakang nga matakdan ta sa COVID-19 nga nagpaabot lang og higayon nga motakboy sila nato.