Mga vendors huwat lang

Tan-awa, gitataw gyud ni Cebu City Mayor Edgar Labella nga gusto gyud unta siya nga pabalikon na ang mga vendors sa pagpamaligya diha sa aseras apan tungod sa lagda sa Inter-Agency Task Force, dili kini mahimo.

Si Presidente Duterte maoy nagsugo sa Department of the Interior and Local Government (DILG) nga ang aseras sa mga national highways dili gyud patindahan aron dili makabalda sa trapiko.

Ang DILG ug IATF maoy nangusog nga dili gyud pabalikon ang mga vendors sa mga aseras sa national roads, sama sa Natalio Bacalso Avenue, Osmeña Boulevard, Colon Street, ug uban pa nga mga karsada dinhi.

Matud ni Mayor Labella nga kon dili niya tumanon ang kamandoan ni Presidente Duterte nga gipatuman sa DILG, masuspenso siya sa katungdanan.

Sa daghang vendors nga naninda sa aseras sa Natalio Bacalso Avenue, kadto ra gyud nga babaye nga matud pa opisyal sa vendors organization diha maoy miinister sa pagpaninda.

Tungod niini, nagubot kay gisakmit man gyud sa PROBE Team ang iyang pushcart.

Si Mayor Labella nagmugna og komitiba aron nga tun-an nila ang pamaagi nga makabalik ang mga vendors.

Kon mahukman sa komitiba nga gimugna ni Mayor Labella nga maayong pabalikon ang mga vendors, kinahanglan pa kini nga mangayo og pagtugot sa DILG, ug ipasabot ngano nga iya kining himoon.

Ang gusto ni Mayor Labella nga i-regulate lang ang mga vendors, dili sab kay magdasok lang sila sa pagpaninda sa Colon. Tan-aw nako, moabot ang higayon nga ang isyu mao na usab ang pagpili kinsa ang makatinda.

* * *

Nabasahan nako sa balita nga katunga ra kuno sa mga PUJs nga nag-operate dinhi sa Metro Cebu ang tugotan nga makabalik sa pagdagan.

Tan-aw nako niini, ang dili na tugotan nga makadagan mao kadtong mga gubaon na nga PUJ nga wa na kaayo tagda pagpaayo sa ilang mga tag-iya nga igo ra’ng mokumkom sa abang, ug kadtong mga gagmay nga PUJ’s sama sa mga multicab.

Angay lang nga ang LTFRB motan-aw gyud pag-ayo nga kadto rang mga lig-on ug dili dunot nga mga public utility vehicles ang tugotan nga makadagan.

Aw, bisan og maayo pa pero makasakripisyo sa mga pasahero, sama nianang mga multicab nga gisumpayan ang chassis aron mahimong PUJ, unya mag-abot ang tuhod sa manglingkod, dili na angay’ng padaganon uy.

Apan kining ako opinyon lang, ug magpaabot kita sa hukom sa kadagkoan sa LTFRB. Apan kamong mga wa pa makasuway, sakay ra gud mo og PUJ nga multicab.