Panahon na

Wala pa matino kun kanus-a gayud tugotan sa lokal nga pangagamhanan nga makaarangkada pagbalik dinhi sa dakbayan sa Sugbo ang tradisyonal nga mga public utility vehicle (PUVs), ilabina ang mga jeepney.

Matud pa sa lokal nga pangagamhanan, dili pa panahon nga makabalik ang mga PUJs, ilabina ning panahon nga gamay ra ang mga commuter sa kadalanan.

Gawas pa, walay mga estudiyante sa mga eskwelahan karon tungod sa online classes.

Mao na’ng nakita sa gobiyerno nga kun tugotan nga makabalik na ang tradisyonal nga mga PUJs sa siyudad, useless kaayo gumikan kay gamay ra man ang mga pasahero. Sigurado nga malugi gayud sila, ilabina sa gasolina.

Usa pa, miepekto pa ang lagda sa social distancing sa mga depasahero nga sakyanan taliwala niining coronavirus disease nga mihasi karon sa kalibotan. Ug dili kita makapaabot nga mapuno ang sakyanan matag pamasada.

Hinuon, adunay mga bag-o ug modernong jeepney ug minibus nga nagbiyahe karon matag adlaw palibot niining dakbayan ug Metro Cebu nga mas dako ang kapasidad kay sa ordinaryong mga PUJ. Apan maihap lamang ang ilang gidaghanon sa pagkakaron.

Daghan ang miuyon sa lakang sa lokal nga pangagamhanan pagdili una sa pagpamasada sa tradisyonal nga mga PUJ.

Hapsay na karon ang kadalanan ug minos na usab ang problema sa trapiko nga mugna sa nagkalandrakas nga sitwasyon kaniadto.

Hinuon, angay usab nga usbon sa gobiyerno ang sitwasyon inig balik na unya sa mga PUJ. Hinaut unta nga tugotan lamang kadtong mga PUJ nga roadworthy nga makapamasada sa sentro sa dakbayan ug nga angay na nga idispatsar kadtong mga karaan ug tayaon na.

Bitaw. Alang kanako, panahon na nga molihok pag-ayo ang national government pag-modernize sa sektor sa mga PUJ.

Kanus-a pa man kita mohunong pagtiner niinig mga karaan nga mga jeepney? Dili man siguro ikabalaka sa ubang drayber nga makulban sa kaldero. Kini gumikan kay dunay mga livelihood program nga gitagana alang kanila.