Pasidaan sa ahat nga bakuna
Labihan kadinalian sa panginahanglan sa pagtugot na sa labing masaaron nga mga kandidatong bakuna batok sa COVID-19. Apan ang pait nga kamatuoran mao nga bisan ang kinakusgan nga mga kandidato di makabuntog sa labing higpit nilang kaatbang--ang kakuwang sa panahon.
Kuwang ang panahon pagsusi sa mas malungtarong epekto, nga matino lang human sa pila ka tuig, ngadto sa mga nabakunahan kon tugotan na karong tuiga ang nag-unang mga kandidato nga nasugdan pagmugna unom ka buwan pa lang ang nilabay batok sa kagaw nga nitumaw siyam pa lang ka buwan ang nilabay.
* * *
Mipadayag og kabalaka ang mga eksperto sa ahat nga mga bakuna:
- Ang mga mabakunahan bisan pasidan-an nga 50% rang epektibo mahimong mokumpiyansa ug mopasamot sa lapad ug paspas nga tinakdanay;
- Kon simbako may magasakit o mangamatay sa mga mabakunahan mahimong di na mosalig ang katawhan bisan may mas maayong mga bakunang mamugna sa umaabot; ug
- Mahimong dugokan sa kinabag-an ang ahat nga mga bakuna ug biyaan sa mga boluntaryo ang nagpadayon nga abanteng clinical trials sa laing 40 ka kandidato nga posibleng maglakip sa mas epektibo pang mga bakuna.
* * *
Nakaginhawa og luag ang mga eksperto nga nahadlok nga malubag ni US President Donald Trump ang mga bukton sa kadagkoan sa US Food and Drug Administration (FDA) sa pagduko ug paawot sa iyang panghambog nga magsugod nang pagpamakuna sa mga Amerikanhon karong Nobyembre 1, duha ka adlaw sa di pa ang piniliayng presidensiyal nga padayon siyang nangiwit sa iyang karibal nga si Joe Biden.
Masaligon silang ipatigbabaw sa siyam ka higanteng mga kompaniya sa tambal ang ilang kauyonan nga di sila mangayo og pagtugot sa ilang mga bakuna kon di makumbinser sa ilang kaluwas ug ka-epektibo.
* * *
Samang mga eksperto gikuwangan ra hinuon sa kasayuran nga gihatag sa siyam ka kompaniya nga nipirma sa kauyonan mahitungod sa mga pagtuon sa ilang kandidatong mga bakuna. Gihulagway nga manghod lag diyutay sa Russia ug China ang pagtago sa sangpotanan sa human trials.
Tungod sa pagsaway, gipagawas dayon sa Moderna ang dugang detalye sa ilang pagtuon. Hinaot nga mosunod ang AstraZeneca, Pfizer ug ubang mga kompaniya sa pagbutyag unsay tinuod nga nahitabo sa ilang Phase 3 trials.
* * *
- Latest
