EDITORYAL - Bantayan ang pondo

Gikatakdang sugdan karong adlawa ang pagtuki sa Ubos Balay Balauranan ang gisugyot nga P4.5 trilyones nga nation budget para sa sunod tuig 2021. Ug ning tungora, giingong bukas kini sa publiko pinaagi sa social media.

Ang maong budget nga posibleng himoong P5 trilyones kun makita sa House appropriations committee ang mga galastohanan nga giandam sa Department of Budget and Management makatabang gyud sa paspas nga pagbangon sa ekonomiya sa nasud gikan sa pandemiya.

Gikinahanglan sa gobiyerno nga mopagawas og dakong pundo para sa sunod tuig aron mapulihan o mapadayon ang mga gikatakda untang buhaton karong tuig 2020 nga nakanselar tungod sa pag-divert sa mga pundo para sa COVID-19 measures sa gobiyerno.           

Una sa tanan, kinahanglang siguradohon ang budget sa edukasyon, panglawas, imprastraktura ang seguridad sa nasud. Mao kini ang mga nag-unang kinahanglang gahinan og dakong pundo. Ang edukasyon maoy puhonan sa nasud alang sa kalamposan niini, ug dili sab kini molampos kun way kasigurohan ang kahimsog sa katawhan.

Ang imprastraktura makapalambo sa patigayon ug aron mamentinar ang ug mapadayon ang kalamboan kinahanglan adunay credible defense ang nasud gikan sa mga hulga sa sulod ug sa gawas.

Angay sab mogahin og pundo nga itabang sa mga lokal nga mga manufacturers ug mga gagmay nga mga patigayon ilabi na kadtong grabeng naapektahan tungod sa pandemiya.

Apan kinahanglang tutokan sa publiko kun asa padung ang maong budget ug kun gamitonon ba gyud sa gitaganaan niini para sa paspas nga economic recovery sa nasud.

Sa ngalan sa “transparency,” makasalmot pinaagi sa social media ang mga netizens ug giingong mahimo sab silang motampo og panahom o mangutana bahin sa maong budget.

Dako kining oportunidad sa katawhan para sigurohong ang matag usa ka dakong kwarta sa katawhan gamiton sa husto.

Sa sunod tuig magsugod na og kisaw ang politika ug kinahanglang dili malipat ang katawhan sa pundo sa gobiyerno.