Gustong ipatangtang ang apelyido sa amahan

Dear Atty. Divine,

Duna koy tulo ka anak sa akong kanhi partner, ang duha nako nga bata nagsunod sa iyang apelyido samtang ang ikatulo naggamit sa akong surname. Nagbuwag mi sa amahan sa akong mga anak ug wala siya magsupprta sa mga bata og di sab mi kasal. Karon gusto unta nako nga ilisan ang apelyido sa duha ka bata ngadto sa akong apelyido, pwede ba nako kining buhaton? Samtang ang ako sab nga gigamit nga apelyido sukad kaniadto og sa tanan nakong dokumento mao ang apelyido sa akong mama instead nga apelyido sa akong papa, pwede ba nga mao nalang kini ang akong ipadayon sa paggamit? Daghang salamat. —Sheena

Dear Sheena,

Maglisod ka na sa pag-usab sa apelyido sa imong mga anak nga imong giparehistro gamit ang apelyido sa ilang amahan. Ang wa pagsuporta sa amahan og ang inyong panagbuwag dili mahimong basihan aron ipausab sa korte ang ilang apelyido samtang sila menor de edad pa. Hinuon, kon ang imong mga anak moabot na sa 18 anyos og mo-decide sila nga ilang ipausab ang ilang apelyido mamahimo silang mo file og petition sa korte kon gusto nilang ilisan ang apelyido sa ilang amahan ngadto sa imong apelyido. Apan karon nga minor de edad pa sila dili ka makausab niini. Samtang kalabot usab sa imong paggamit sa apelyido sa imong mama, kon nagtakdo ang tanan nimong dokumento lakip na imong school records og mga ID pwede ra man nga imo nalang kini nga ipadayon as long as magtakdo tanan nimong records. Thanks and God bless. —Atty. Divine

* * *

Alang sa inyong pangutana, palihug lang sa pag email sa [email protected] og akong tubagon ang inyong pangutana pinaagi sa akong column matag Miyerkules, Sabado ug Domingo.