Sa ilang pagpawong sa sibyaanan
Kay panahon di man kapugngan, bisan mawili dinhi ra mi taman, inyong kapamilyang gikauban sa 32 ka tuig ug usa ka buwan. Wa mapiog ang kakulian ug puwersang lahig katuyoan, maong manamilit sa kahanginan. Tugoting kamo pasalamatan, sa kadaghang kapilian, kami ang inyong gisaligan.
Gipaluyohan ang tanang kalihokan pag-alagad sa kinabag-an ug sa labing nagkinahanglan, pagluwas sa nangaigo sa katalagman, pagpakaon sa mga nasunogan, paghatod og bugas, tambal ug sud-an, pagtunol sa kuwang nga plitehan, pagpangita sa nahanawng kaparyentihan, pag-uli sa butang nakalimtan, pag-impas sa bayranan,
* * *
Paghapuhap sa nagbangotan, pag-agak sa may kakulian, pagtukod sa lawak-saringan, pagtampo og gamit sa eskuylahan, libro ug lapis sa kabataan, scholarships sa pobreng tinun-an, pagsibya og balita ug kasayuran, paghatag og tingog sa kinasuokan, pagbansay sa magsisibyang kabatan-onan, pagpaminaw sa tiyabaw sa katilingban.
Pagpanalipod sa kinaiyahan, pagsugod og kapanginabuhian, pagduyog sa Sinulog ug kapiyestahan, pakighugyaw sa Sadsad ug Baranggayan, pag-abiba sa mga caravan sa malls ug kamerkadohan, pag-apud-apod og duwaan, pagpalambo sa atong pinulongan, pagsubay sa kultura ug kasaysayan, paugnat sa kusog ug lumba sa dagan, sa pagtambayayong atong nalayagan ang barutong makapyotan taliwa sa kalaworan sa kalisdanan.
* * *
Pasidungog sa among kaparyentihan sa pagsabot sa kakuwangan, sa mga higayong nataligam-an, gipalabing trabahong mas dinalian. Paghigugma sukad sa sinugdanan nakapagaan sa kakulian, nakahimong mas tam-is sa kadaugan.
Saludo sa among kaubanan, panaghigalaay di makalimtan, pagtinabangay di malabwan ug labing bililhong handumanan. Way nahibawo unsay dangatan, unsaon pagsugakod sa kalisdanan. Apan bisan asa pang padulngan, sa kahitas-an di ta pasagdan, kay niadtong nangita pag katrabahoan, sa ABS-CBN ta niya gitultolan.
Yukbo sa among kadagkoan, sa mapailubong pag-atiman, pagsabot bisan sa personal nga suliran, pag-unong sa mga krisis nahiagoman, pagpaamgo sa mas dakong kapuslanan: Kinabuhi mas puno sa kahulogan kon puy-an alang sa uban.
* **
Pasalamat sa ABS-CBN di matupngan, kami gimatuto ug gisaligan, nakatukod og mga pinuy-anan, pagpangga sa pamilya natagamtaman. Tuohi nga di ni maoy kinutoban. Samtang mangandoy pa’g kaangayan, pagkita natog usab di kababagan.
Kining pagsuway makadugang di makaiban sa pagtuo nga ang banagbanag maabtan, nga katarung subling mahuptan, nga kaligdong mopukan sa kadaotan. Busa mga luha atong pahiran, mangaliya ug mosalig sa kamatuoran: ang pamilya hangtod sa kahangturan!
* * *
- Latest
