Senior citizens bahasa ni

Hatagan nako og giya ang mga senior citizens nga gustong mokubra sa ilang cash assistance nga wa pa makuha para sa buwan sa Marso, Abril ug Mayo. Bali og P3,000 ang inyong kubrahonon gikan sa Cebu City Hall.

Ang pagpanghatag adto himoa sa Cebu Colesium sa Sanciangko Street, apan kay ang mga senior citizens wa pa man tuguti nga makagawas sa ilang balay, pwede ra nga ang ilang “representative” ang mokuha.

Unsaon ninyo paghimo? Maghimo kamo og “authorization letter” nga dunay pirma nga gitugotan ninyo ang inyong mga anak, apo ug bisan kinsa nga maoy mokubra sa inyong cash assistance.

Unya, kinahanglan nga ipa-photo copy ang inyong mga senior citizen’s ID, ug magpakuha kamo og hulagway nga maggunit og newspaper nga ipakita gyud ang petsa sa mantalaan.

Ang tumong niini aron pagsuta nga kamong senior citizen nga gustong mokuha sa inyong cash assistance, buhi pa. Inyo na ba nga nasabtan?

Ang pagpanghatag sa mga senior citizens sa south district himoon sa Agosto 29, 30 ug 31, ug ang nagpuyo sa north district unya ipanghatag sa Septiyembre 1 ug 2.

Kon pananglit ang senior citizen namatay kaniadtong Marso 29 ba, makadawat gihapon siya og usa ka buwan, pero mora’g pangitaan na og death certificate ang ilang mga primary beneficiary.

Unya, kay ang kagamhanan sa Dakbayan sa Sugbo mohatag na man sab og laing tag P3,000 sa mga senior citizens para sa buwan sa Hunyo, Hulyo ug Agosto, paghuwat na lang mo sa tagsatagsa ninyo ka panimalay kay ihatud ra ang inyong mga cash assistance.

Ang klarohon ha nga ang hatagan og cash assistance kadto ra nga senior citizens nga accredited sa Office of Senior Citizens Affairs (OSCA) office sa Dakbayan sa Sugbo.

Makadawat man gud ko og daghang pangutana kon apil ba silang mga senior citizens sa mga dapit sa probinsya. Wa mo’y labot kay ang kwarta gikan ra man sa Cebu City government.

Sa ngalan sa mga senior citizens sa Dakbayan sa Sugbo, ako magpasalamat kang Mayor Edgar Labella ug sa ubang opisyal sa siyudad, nga hangtud karon padayon sila nga mitabang sa mga senior citizens.

* * * 

Nahibalik na ang naandan nga gidaghanon sa tubig sa Mananga Dam sa Barangay Buhisan, ug sa Jaclupan Dam sa Talisay, apan naglibog ko nganong hinay man gihapon ang pressure sa tubig sa MCWD?

Giadto Nako kagahapon ang tagdumala sa MCWD booster pump atubangan sa Marco Polo Plaza Hotel ug nahibaw-an nako nga hinay gihapon kaayo ang pressure sa tubig nga miabot didto.

Mao ni ang rason nga kami sa bukid, way agas hapit na tuig.