Dili angay molugak

Dili nato malalis nga miani gayud og positibo nga resulta ang higpit nga pagpatuman sa mga quarantine protocol batok sa coronavirus disease dinhi sa probinsiya ug dakbayan sa Sugbo sa niaging mga bulan.

Sukad sa niaging duha ka semana, mitiglom gayud ang inadlaw nga ihap sa bag-ong kaso sa COVID-19 sa lalawigan ug siyudad. Gikan sa ginatos nga rekord sa mga kaso, mius-os na lamang kini ngadto sa dinosena matag adlaw.

Dili ikalimod nga dako kaayo og epekto ang pagpatuman sa estrikto nga health guidelines sa dihang anaa pa sa enhanced community quarantine ug modified ECQ ang dakbayan sa Sugbo niadtong Hunyo ug Hulyo.

Apan dili kita angayan nga mo-relax tungod niining maayong kalamboan. Kay basin baya kun takulahaw lamang nga mosiaw na usab ang coronavirus disease kun mobalik na usab kita sa naandang pagpabaya niini sama sa nahitabo kaniadto.

Tungod lagi kay mipauli na kadtong mga sakop sa Special Action Force sa kapolisan, basin unya kun mosiaw na usab ang mga badlongon ug manggawas na hinuon ngadto sa kadalanan bisan kun walay balidong tuyo. Kay lagi minos na ang presensiya sa kapolisan nga nagbantay.

Mao nang angay lamang usab nga pahugtan sa otoridad, ilabina sa kapolisan, ang pagpatuman sa mga lagda sa quarantine sa dakbayan. Alang kanako, mas samot nang higpitan pa nila ang pagbantay sa kadalanan.

Kay kon molugak usab ang otoridad sa pagpatuman sa lagda niining panahon sa general community quarantine sa dakbayan sa Sugbo, dili kalikayan nga abusonan usab kini niadtong mga badlongon. Ug kuyaw gayud nga mosulbong na usab ang mga kaso sa maong balatian.

Kon unsa ka estrikto ang pagpatuman sa mga lagda panahon sa ECQ dinhi sa siyudad, angay lamang nga sama usab ka higpit ang pag-implementar sa mga palisiya niining panahon nga daghan nang tawo ang magyampungad sa kadalanan.

Kini kun gusto gayud kita og tinud-anay nga kampanya batok sa coronavirus disease.