Katalagman

Gawas sa pandemiya sa coronavirus nga kasamtangang nasinati karon duna pay mga problema ang angayang matngonan sa katawhan.

Bag-ohay gitay-og sa 6.6 magnitude nga linog ang Cataingan, Masbate nga nakamugna og danyos sa ilang mga imprastraktura ug nakakalas usab og kinabuhi.

Ang naasoyng linog nabatyagan usab sa ubang mga dapit sa nasod apil na sa Sugbo. Hinuon hinay ra apan murag nakaapekto sa mga dapit nga prone sa landslide.

Sama sa Barangay Agsongot dakbayan sa Sugbo nga nakasinati og landslide diin miliki ug nahugno ang tipik sa bukid nga mitabon sa karsada.

Maayo nalang kay walay tawo nga naigo pero hingpit nga natabonan ang agianan nga nakaapekto pud sa unom ka barangay.

Gituohan nga natandog ang bato sa pag uyog sa linog ug napun-an sa pagsige og uwan hangtod nga natumpag gyud.

Samtang sa silingang mountain barangay nga Bonbon nakasinati usab og flash flood.

Tulo ka mga balay ang gibanlas sa baha niadtong Lunes sa hapon, maayo nalang nga walay tawo nga nasakitan o nakalas kay nakaikyas dayon sa pag abot sa tubig.

Matud sa mga tawo nga kalit kaayo ang tubig nga kon nahitabo kadto panahon sa kagabhion hayan naa gyuy makalas nga kinabuhi.

Mokabat sa 17 ka mga pamilya ang apektado sa naasoyng flash flood kansang mga pinuy-anan nakan-an sa tubig.

Anaa sila magpuyo sa daplin sa sapa sa sitio Managoksok nga delikado kaayo panahon nga masinati ang kalit nga pagbundak sa uwan.

Sa unang higayon kuno nakasinati sila og ingon niadto ka kusog nga baha nga gitoohan nila nga basin naay buhawi.

Ang ingon niini nga panghitabo angayan nga tutokan dili lang ang kagaw kay simbako lang mataligam-an kinabuhi usab ang nakapusta.

Sa lima ka buwan pulos COVID-19 nalang ang bida, siguro karon tagdon na usab ang mga problema nga naandan na ilabi na niining panahon sa ting-uwan.

Ang pagpangandam maoy angayan natong batonan aron usab maangkon nato ang kaluwasan.

Labaw sa tanan, ang atong hugot nga pagmatngon ug pag-ampo nga ilikay kita sa katalagman ang atong mahimo karon.