Hilaw nga produkto

Taliwa sa pasiatab ni Education Secretary Leonor Briones nga andam na ang iyang ahensiya pagbukas unta sa klase karong Agosto 24, nahukman ni Presidente Rodrigo Duterte nga iuktaba kini hangtud sa unang semana sa Oktubre.

Kini tungod sa pagpaubos og balik sa Metro Manila sa modified enhanced community quarantine nunot sa pagsulbong og balik sa mga kaso sa COVID-19.

Ang sugyot pag-uswag sa pagbukas sa klase ngadto sa sunod buwan naggikan ni Senador Bong Go.Bisan  salikwaot nga mas gituohan ni Duterte si Go kay sa kalihim mismo sa DepEd apan uyon ko sa iyang disisyon nga ilangan pa ang pagbukas sa klase.

Tataw nga dili pa andam ang DepEd sa bag-ong paagi sa pagtudlo ubos sa gitawag og new normal. Bisan ang mga materyales nga gikinahanglan sa pagtudlo wala pa hingpit nga maandam.

Kwestiyonable pa ang ubang materyales human matribukar ang mga sayop niini. Unsay resulta kun sayop ang mga materyales nga ihatag ngadto sa mga tinun-an labi pa nga wala diha ang mga maestra nga makagiya nila ubos sa bag-ong paagi sa pagtungha?

Hangtud karon ang ubang mga magtutudlo nagkapuliki pa intawon pagpangita kinsay mohatag nila og bondpaper nga magamit sa pag-imprinta sa gikinahanglan nga mga modules.

Kuwangan ang maintenance and other operating expenses (MOOE) sa mga tunghaan aron ipalit sa gikinahanglan nga supplies. Gani duna koy mga higala nga magtutudlo nga kuwang nalang magpakilimos aron makapalit intawn sa supply nga ilang gikinahanglan.

Mao ni tinuod nga kahimtang sa atong mga publikong tunghaan bisan sa pangangkon ni Briones na andam na sila nga mangabli sa klase. Wala pay labot niini ang realidad sa kalaksot sa atong internet service.

Ambot unsa kahay gama sa mga online classes taliwa sa nagkamang nato nga koneksiyon sa internet. Gawas niini dili tanang dapit dunay available nga koneksiyon  sa internet.

Ang mas praktikal nga buhaton sa gobyerno mao ang pagpaabot nga molurang ang pandemiya o ba kaha sa bakuna nga mamahimong available sa merkado sa dili pa buksan og balik ang mga tunghaan.

Way kapuslanan nga mangable sa tunghaan apan dili magkadimao ang pagtudlo tungod kay dili andam ang imprastraktura ug ang ubang gikinahanglan sa bag-ong sistema. Ang resulta niini mao ang produkto nga hilaw.

Mas dako ang risgo nga dili takos ang mga mamahimong produkto unya ubos sa ahat nga sistema.