EDITORYAL - Mosanong man lagi?

Kini ang pangutana kabahin sa matud pa pagkagahi og ulo sa mga Sugboanon pagsunod sa mga health protocols nga gihan-ay sa Dakbayan sa Sugbo sukad pa sa pagsugod sa pandemiya.

Ang simpleng pagsunod niini sa nakalabay nga usa ka buwan dako og natampo sa pagkontrol sa pagkatap sa novel coronavirus dinhi sa siyudad, apan  tungod sa tabang sa Inter-Agency Task Force nga nisuporta sa dakbayan. Sa nigawas nga data sa Department of Health Central Visayas niadtong Martes, Hulyo 28, 2020 milapas na og singko mil ang mga nangaayo ug nikubos ang gidaghanon sa mga nadugang.

Ang maong kalamboan wala nakaipsot sa obserbasyon nila Environment Secretary Roy Cimatu kinsa maoy gitudlo ni Duterte nga mamumuno sa COVID-19 response sa Cebu City.

Gibasol ni Duterte ang giingong “kagahi og ulo” sa mga Sugboanon maong gibalik gikan sa GCQ ngadto na sab sa ECQ ang siyudad gikan Hunyo 16 hangtud Hulyo 15 hangtud nikubos ngadto sa modified GCQ ug gipaabot nga mag GCQ karong Agosto 1.

Ang pagsulbong sa maong mga kaso tungod kadto sa wala pagsunod sa mga tawo sa health protocols sama sa pagsuot og facemask, social distancing, pagsige og panumbalay bisan di importante ang mga lakaw.

Ang resulta, nakakuha sila og virus sa gawas ug ilang nadala sa ilang balay ug nataptan ang ilang mga katiguwangan ug mga masakiton.

Kun wa pa ang IATF nanganhi dili makab-ot kining kalamboan tungod kay daghang magsupaksupak nga may sagol pamolitika batok sa mga gipanghimo sa Cebu City pinangulohan ni Mayor Edgardo Labella.

Nakatabang sab kining kausabang gihimo sa IATF pagbalhin sa tanang positibo sa COVID-19 ngadto sa isolation facilities ug pagmando sa mga barangay officials pagbuhat sa ilang trabaho pagpatuman sa health protocols. Sayo pa kaayo aron mamakpak ug magmaya kay taas pa kaayo og latason ang dakbayan aron hingpit makontrolar kining maong sakit.

Apan kining tanan naa ra gyud sa mga kamot sa mga Sugboanon ug mga barangay officials kun di gihapon masunod ang health protocols.

Kun nisanong lang daan ang tanan sa estratehiyang unang gipatuman sa siyudad wa gyud untay nahitabong ECQ Part 2.