Dili angay magpaulipon

Daghan ang miinsister karon nga angay lamang gayud nga iuktaba una ang pagpahigayon sa klase karong tuiga gumikan sa nagkagrabe nga sitwasyon sa coronavirus disease o COVID-19 sa nasud.

Gani, adunay mga ginikanan nga dili na lamang una mopatungha sa ilang mga anak karong tuiga sa kahadlok nga matakdan ang ilang mga anak sa maong balatian, ilabina kun maghugop na ang mga estudiyante sulod sa classroom.

Hinuon, pursigedo gayud ang national government nga ablihan ang klase sa sunod bulan. Gani, nakahan-ay na ang mga alternatiba alang sa pagminos sa classroom gathering. Kini pinaagi usab sa online classes ug ubang long distance learning program.

Alang kanako, wala akoy nakitang rason ngano nga kinahanglan pang i-postpone una ang klase tungod sa dakong suliran sa coronavirus disease. Anugon ang panahon alang sa mga estudiyante, ilabina ilalum niining sistema sa K to 12.

Kon makaya sa kagamhanan ang pagpahigayon og online classes ug uban pang distance learning program alang sa mga estudiyante, nganong dili man nato kini ipursige taliwala niining paglambo usab sa teknolohiya?

Wala man siguroy atong kahadlokan kon mosaler lamang ang mga alternatibong programa alang sa pagpadayon sa klase karong tuiga. Dili kita angay nga moluhod na lamang ngadto sa kabangis sa COVID-19 ug mokakak gikan sa naandang bulohaton.

Kon adunay daghang pamaagi nga makapadayon kita sa klase nga layo sa risgo sa coronavirus disease ang atong mga estudiyante, nganong dili man nato kini hangpon? So, walay rason ngano nga magpaulipon kita sa maong pagsulay karon.

Usa sa rason ngano nga padayong mi-exist ang humanidad sulod na sa liboan ka tuig mao ang pagka-resilient niini. Hilabihan na ka daghan sa pandemiya, gubat ug mga kalamidad ang mihapak sa kalibotan.

Apan ania karon padayon kita nga nagginhawa.