Cha-cha taliwa sa COVID-19?

Kun tuohan si DILG Secretary Eduardo Año suportado sa 1,488 ka mga mayor sa kalungsoran lukop nasud ang tinguha nga pag-usab sa Constitution.

Iyang gibasi ang maong pangangkon sa resolution nga gipalabang sa League of Municipalities in the Philippines.

Dili hinuon ni imposible tungod kay ang mga mayor maoy unang makabenepisyo sa gitinguha nga kausaban sa batakang balaud labi pa sa sugyot nga tangtangon ang “term limit”.

Ang mga way uwaw nga politiko nga gigamit ang ilang katungdanan sa personal maoy unang malipay kun matangtang ang term limit.

Kini tungod kay wa nay makapugong sa ilang ka hakog ug dili na mabalda ang ilang pagpatuyang sa pwesto.

Sa kasamtangan ang lokal nga mga opisyal gitugtan lang og tulo ka termino kon siyam ka tuig paghupot sa usa ka pwesto.

Human niini gidid-an na siya nga makapasubli sa samang katungdanan.

Kun malibkas ang term limit wa nay magpugong nila nga magpabilin sa pwesto hangtud kanus-a sila mapul-an tungod kay nasayod ta og unsay kalidad sa eleksiyon dinhi sa atong nasud.

Dili ko supak sa kausaban sa Constitution, apan dunay mas importante nga mga probiso nga angayang usbon kay sa term limit.

Ang mga nagtinguha pagkaraw sa term limit nagpaila sa ilang ka hakog ug kamapahimuslanon.

Samtang tinuod nagkinahanglan na og kausaban ang ubang mga probiso sa karaan na nga batakang balaud, apan dunay tukmang panahon sa pagtuki niini.

Ug niining panahon sa pandemya diin daghan ang gigutom ug nahingawa unsay ugma nagpaabot nila ug sa ilang pamilya human nawad-an sa ilang mga trabaho tungod sa pagpanira sa ilang mga kompaniya, ang paghisgot og charter change sa atong mga opisyal dakong baligho sa katawhan.

Dili charter change maoy ilang gipaabot nga madungog sa atong mga opisyal karong panahona.

Ang tataw nga direksiyon unsaon pagpabangon sa nilukapa natong ekonomiya ug unsaon nga kaprotehian ang katawhan sa kabangis sa COVID-19 maoy ilang gipaabot nga madunggan.

Makapaabot ang cha-cha, apan ang nagkutoy nga mga tiyan tungod sa kagutom dili na makahuwat .

Dugay na intawon nga nag-antos ang katawhan, hinaut ang atong mga opisyal sensitibo unta sa mga butang nga angayang ilang hatagan og prioridad.