EDITORYAL - Suportahan ang frontliners

Nagkadaghan na ang mga natakboyan sa novel coronavirus disease, apan dili lang mga ordinaryong mga tawo ang naigo niini. Hasta ang mga frontliners bisan sa ilang pag-amping nangataptan sab sa virus.

Ning bag-o lang, kapin sa 100 na ka frontliners sa Cebu City ang nataptan, apil niini ang mga polis nga nagbantay sa kadalanan ug mga sakop sa Cebu City Hall emergency medical service ug ingon man Barangay Health Workers, duna pay uban gikan sa mga pribadong tambalanan.

Ang pagtakboy kanila sa maong sakit nangahulogan nga nakuhaan ang gidaghanon sa mga frontline personnel sa gobiyerno pag-atiman sa katawhan nga maprotektahan gikan sa maong sakit.

Ang mga frontliners 24/7 nga nagpulipuli og bantay. Sila maoy naa kanunay sa atubangan pagpanagang para sa mga tawo apan sila mao pirmeng mabutang sa diskriminasyon.

Apan dili sila mga kublan sa maong sakit, pangkapuyon ug maluya sab ang depensa sa ilang panglawas.

Apan tungod sa kakuwangon sa mga tawong makamao sa ilang trabaho wala sila mohunong pagserbisyo hinungdan nga nangatakdan na sab sila, ang uban nakabsan gyud sa kinabuhi.

Unsa may gibawos sa uban? Nagpabadlong gihapon diha sa kadalanan. Nagsige og reklamo kay mao ni, mao na. Unya wala motuman sa mga health protocols maong nagkadaghan ang mga nataptan sa maong makamatay nga sakit. Kinahanglan sa Cebu City karon og dugang mga medical personnel nga nihit na kaayong pangitaon aron makatabang sa pag-atiman sa mga pasyenteng nagpositibo sa COVID-19.

Bisan og hatagan pa na sila og dakong dugang nga sweldo sama sa hazard pay, dili kini paigo sa risgong ilang giatubang matag nag-duty sila sa mga tambalanan, health clinics, ambulansiya ug uban pang serbisyong kinahanglan nilang moatubang sa mga tawo.

Gawas sa medical personnel, kinahanglan pa og dugang mga polis nga magbantay aron mopatuo kadtong “habitual nga badlungon” sa kabarangayan masanta.

Maayo unta og makakita ang katawhan sa sakripisyong gihimo sa mga frontliners para kanila kada adlaw, ug mohimo sab sa ilang parte pagpahunong na sa pagkatap sa virus pinaagi sa pagsunod sa mga health protocols sa tanang oras.

Mao lang kini ang suportang ilang gikinahanglan.