Di sa testing lang daugon
Hinaut nga may makahunghong ni Cebu City Mayor Edgar Labella nga angayng hunongon nang iyang linya nga nisulbong ang mga kaso sa COVID-19 sa dakbayan tungod sa lapad nga testing.
Angayng angkonon nga nisulbong ang mga kaso kay lapad nang tinakdanay sa kinabag-an sa kabaranggayan.
Angay sab siyang pahinumdoman nga ang testing di paigo. Kinahanglang subayon ug ibuwag ang tanang contacts sa di pa makapanakod.
Ug, labaw sa tanan, kinahanglang tambalan ang mga masakiton.
* * *
Nalilian sa mga Sugbuanon ang mga buslot sa kampanya:
Naabtan ang Cebu City Health Department og 21 ka adlaw human sa pagkuha sa swab samples una nakapahibawo sa mga molupyo sa Sitio Zapatera sa Bo. Luz nga positibo sa COVID-19;
Giangkon ni Barangay Kapitan Gines Abellana sa Mambaling nga 400 ka positibo sa COVID-19 nagpabilin sa mga pinuy-anan kay kuwang ang mga higdaanan sa barangay isolation center; ug
Nipasangil si City Health Officer Daisy Villa ni City Administrator Floro Casas sa pagsuway pagpaluso sa rapid test kit nga wa ma-rehistro sa Food and Drug Administration (FDA), nisumbalik si Casas nga di takos si Villa, apan way ek si Labella unsa katinuod ang seryusong pasanginlanay.
* * *
Sa niaging semana may mga trabahante sa Cebu City nga nisumbong sa Teleradyo Cebu nga hangtod karon wa pa sila kahibawo unsay resulta sa rapid mass testing nga ilang giapilan niadtong Mayo.
Napugos sila pag-apil tungod sa pasalig sa barangay kapitan nga hatagan og certificate sa pagbalik sa trabaho.
Gawas diay nga wa pa ma-suweldohi ang medical technologists, nakalimtan sab ang pagpahibawo sa mga niapil negatibo o positibo ba.
* * *
Kon matinud-anon ang testing, contact tracing ug isolation, nganong nagpadayon mang pagsulbong sa mga kaso sa COVID-19 sa Cebu City? Posible kaha nga gawas nga wa magkadimao sa pagpatuman, wa pa gyod magamit ang kasayuran sa pagpugong sa pagkatap sa lokal nga tinakdanay?
Ug posible kaha nga nibilib si Labella sa iyang pangangkon nga mayoriya sa mga nag-positibo asymptomatic maong nataligam-an nga nagkadaghan sab ang mga psymptomatic ug wa kapangandami ang pagpalambo sa kapasidad sa mga tambalanan hangtod nga niawas nang mga pasyente sa hallways ug sa gawas ug nabalibaran na hastang mga himatyon?
* * *
- Latest
