Nagdali aron matakdan?

Daghan gyud kaayong mga tawo ang gusto na nga mogawas sa ilang panimalay. Wa na sila mahadlok nga matakdan og Coronavirus Disease kay kuno “naburyong” na sila pag-estar sa ilang kabalayan.

Aw, sige, maayo tingali Mayor Edgar Labella nga ato na lang sila nga tumanan. Sa pagsuwat nako niining lindog kagahapon, ang confirmed COVID-19 cases dinhi sa Dakbayan sa Sugbo niabot na og 2,144.

Nahinangop na lang hinuon si Mayor Labella kay niabot na man og 792 ang naayo na sa COVID-19 human sila napositibo sa maong virus. SIge, kay kadtong wa pa makasuway, gusto man nga mosuway, ato sila nga tumanan.

May kaila ko nga natakdan og COVID-19 pwerte man gani nila nga problemaha kay dili sila basta-basta nga makabisita sa ilang sakop sa pamilya didto sa ospital.

Unya, ang mga sakop sa pamilya sa maong na-Covid, nakabantay nga ang ilang mga kanhi higala, mora’g naglikay-likay na kanila. Dili hinoon kini maayo nga kinaiya.

Kon dili man gani tinuyoan nga natakdan, dili maayo nga ato sila nga yam-iran. Apan kining mga tawo nga nagdali gyud nga madeklarar nga wa na’y quarantine aron sila makasuroy, maoy dili angay’ng kaluy-on.

Pagdeklarar nga ECQ sa Dakbayan sa Sugbo, maihap ra sa tudlo nga migawas ko sa balay, ug kini tungod kay nangompra mi og pagkaon, ug namalit og tambal.

Kompleto pa gani ko og pass, red pass ang gipahatag ni Mayor Edgar Labella nako, apan wa gihapon ko mogawas-gawas. May programa ko sa radyo apan dia ra ko nagsibya sa akong broadcast studio sa bukid.

* * *

Pagsuwat nako niini, nagubot ang mga netizen kay dunay post sa social media nga       kuno ang Dakbayan sa Sugbo ubos na sa Modified General Community Quarantine (MGCQ).

Tan-aw nako sa post nga ang naghimo wa lang kaayo makasabot nga ang “Cebu” nga gibutang sa kamandoan gikan sa Inter-Agency Task Force for COVID-19, mao ang probinsya sa Sugbo ug dili ang Cebu City.

Unsaon pagka MGCQ sa Cebu City nga ECQ pa man gani ta hangtud karong Domingo. Nalipat ra ang naghimo sa maong pahibalo mao nga nagkaguliyang ang mga netizens.

* * *

Tinuod, dako na gyud kaayo ang alkanse sa mga negosyo karong panahona.      

Bisan gani ang akong kaugalingong negosyo apektado kaayo kay ang mga kliyente nako, utro pa man nga apektado sa krisis.

Buyno, agad-agad ra gyud ko. Kon ilibkas ang ECQ ug tugotan na ang mga tawo nga makasuroy na, apan tambag nako nga pagsul-ob gihapon mo og face mask ug mag-physical distancing.