EDITORYAL - Pagamyan ang lockdown

Dili lang ang tawo, ang sitio o barangay sa usa ka lugar nga dunay kaso sa coronavirus disease (COVID-19) ang naapektahan niini, kondili hasta kadtong wala natakboyi niini ug ang ilang tibuok komunidad.

Naobserbahan kini sa nangaging duha ka bulan, dihang gipatuman sa gobiyerno ang hugot nga enhanced community quarantine sud sa usa ka bulan.

Ang resulta, nanirado ang daghang balay patigayon, daghan ang nawad-an og panginabuhian, nihunong og tuyok ang ekonomiya samtang ang gobiyerno mipagawas og bilyones nga pundo aron suportahan ang milyones sab ka mga tawong naapektahan sa lockdown.

Apan kun subayon, panagana lang kadto sa gobiyerno nunot sa tinguhang makontrol ang gipaspason sa pagkuyanap sa virus tungod sa paggawas-gawas sa mga tawo.

Ang problema sa pagbuhat niini, hasta kadtong mga lugar nga wa gyuy kaso sa maong sakit nahunong sab sa ilang naandang kalihokan. Sa laktod, naapektahan gyud ang tanan.

Miabot na og duha ka bulan ang lockdown gihinahinay na og libkas ang ECQ ug gibutang na sa general community quarantine ang kadaghanan sa mga lugar, ug hinayhinay usab nangabli ang ubang mga negosyo.

Apan bisan pa niini, dili pa gihapon makabawi ang ekonomiya sa nasud ug bisan sa mga lokalidad kun yduna pay mga dapit nga ubos sa ECQ sama dinhi sa Sugbo.

Nagpabilin ang kahadlok sa mga tawo tungod sab kini sa padayong pagpaubos kanila sa ECQ. Daw sa ilang hunahuna grabe gyud ka kakuyaw pa ang magawas sa balay o pagtambong sa trabaho.

Maayo kining pamahayag ni Secretary Carlito Galvez Jr. nga gisugyot kang Presidente Rodrigo Duterte niadtong Martes sa gabii, pagamyan ang nasakop sa mga lockdown.

Gisugyot karon nga ipaubos nalang sa barangay level ang lockdown, inay nga ang tibuok siyudad o lungsod. Aning paagiha, makapadayon ang ubang mga barangay o mga dapit sa ilang ekonomikanhong kalihokan.

Ang mga barangay nalang gyud nga dunay daghang kaso maoy i-lockdown ug mas maayo kini kay matutokan gyud ang pagbantay ug pag-atiman kanila nga di kinahanglang mahasol ang uban.