Natanggong nga swab samples
Tungod sa tiyabaw sa lokal nga mga opisyal sa nagkataas nga kalangay sa paggawas sa resulta sa Covid-19 testing sa laboratoryo sa Vicente Sotto Memorial Medical Center (VSMMC), gidudahan ang pasalig sa Malakanyang nga takos nang VSMMC pagsusi sa mas daghang swab samples gikan sa gidudahan nga mga masakiton.
Atubangan sa mga pasalig nga mas mopaspas pa ang Covid-19 testing ug sa reklamo sa lokal nga mga opisyal sa Central Visayas sa mas dugay nga pagkatanggong sa ilang gipada nga swab samples, asa man ta mangita sa mas tukmang kasayuran?
* * *
Sa sesyon sa Cebu City Council sa niaging semana, nipahibawo si Konsehal Raymond Garcia nga sa iyang labing uwahi nga pakisusi duna nay 10 ngadto sa 11 ka PCR machines sa laboratoryo sa VSMMC ug busa nipasalig siya nga mahurot na pagsusi ang tanang natanggong nga swab samples, nga ang kinabag-an gikan sa labing daghan og kaso nga mga barangay sa Cebu City.
Wa mosuti si Garcia kinsa ang tinubdan sa iyang kasayuran. Wa sab mo-detalye pila ka PCR machines ang aktuwal nga gigamit sa duha na ka laboratoryo sa VSMMC.
* * *
Apan atol sa samang sesyon nibutyag si Konsehal Nestor Archival og sukwahi nga kasayuran. Lahi ni Garcia nga wa mohisgot og tinubdan, gipahibawo ni Archival nga nakadawat siya og pormal nga suwat gikan ni Dr. Gerardo Aquino, ang medical director sa VSMMC, nga nitug-an nga upat ra ka PCR machines ang naa sa ilang mga laboratoryo sa VSMMC.
Way sakop sa konseho ang nagtagad paghusay sa nagkasungi nga mga numero nilang Garcia ug Archival.
* * *
Human sa pila ka adlaw, akong nabasahan ang pahibawo ni Gobernador Art Yap sa Bohol nga nalangay ang pagsusi sa swab samples sa mga Bol-anong OFWs kay, ug iyang gikutlo si Regional Director Jaime Bernadas sa Department of Health Central Visayas, usa ray PCR machine nga magamit kay gubaon ang uban.
Dihang gipangayoan og katin-awan si Angie Saniel sa DYAB Radyo Patrol, giingnan siyang Bernadas nga way makinang nagguba kon dili nahimut-okan lang ang ilang sistema sa kadaghan sa swab samples. Gubaon man o nahimut-okan lang, gibalibaran sa VSMMC ang Bohol nga di una sila modawat og bag-ong swab samples.
* * *
- Latest
