Saludo ko mayor!

Nakadayeg ko ni Lapu-Lapu City Mayor Junard “Ahong” Chan kay miangkon gyud siya nga daghang kwartahan sa iyang siyudad ang mapahimuslanon kaayo sa higayon kay midawat sila og cash assistance nga P6,000 gikan sa kagamhanan pinaagi sa Social Amelioration Program (SAP).

Akong klarohon ha, way labot ang mga mayor sa pagpili kon kinsa ang iapil sa lista sa SAP. Ang mga sad-an kon ngano nga daghang “disqualified” unta apan naapil sa lista sa SAP mao ang mga kapitan sa kabarangayan kay nagpataka lang sila pagpili sa ilang mga kawani nga gitahasan pag-abag sa taga DSWD.

Ang mao nga mga kawani sa barangay, wa gyud mosuroy sa kabalayan aron makita gyud unta nila kon kinsa ang angayang hatagan.

Resulta, daghang mga kwartahan ang naapil sa lista kay igo ra man sila midawat sa mga application nga gipataka ra nila’g panghatag.

Gani, sa Lapu-Lapu City mismo, usa ka kawani sa Social Services Office sa maong siyudad ang nag-atubang ron og imbestigasyon kay nagpahimulos kini pinaagi sa pag-apil sa lista sa SAP sa iyang mga suod nga kabanay nga disqualified gyud unta nga makadawat sa hinabang.

Unta, tinud-on ang bahad sa kadagkoan sa DSWD nga ipangkiha ang mga opisyal nga nagpataka lang sa pagpanglista ug miapil sa ilang mga suod, ilabi na ang mga dumadapig nila, ug ang mga pobre hinoon nga angayang tabangan wa na maapil.

* * *

Tungod sa kadaghang reklamo sa katawhan nga nangita na kon hain kadtong bugas nga gipahibalo ni Mayor Edgar Labella nga ipanghatag sa ikaduha nga hugna, akong gi-follow-up ang mayor, agi og pagtabang sa mga nagreklamo.

Giingnan ko ni Mayor Labella nga ipaingon ang katawhan nga papaaboton lang kay gi-process na nila ang pagpalit og 150,000 ka sako nga bugas humay aron ipanghatag sa mga kabus sa ikaduhang higayon.

Gipahibalo na hinuon sa mayor nga tag 15 kilos ra ang ipanghatag aron nga mas daghan ang makadawat.

Para nako, dili lang gyud ta magsalig niini kay pila ra gud nang 15 kilos. Hinuon, may palitanan ko nga barato kaayo nga bugas, Ganador ang brand, ug tag P46 ra ang kilo.

Tan-aw nako, misamot nga malangan ang pagpanghatag sa bugas ngadto sa mga lumolupyo kay giuna sa paghatag kadtong mga lumolupyo sa mga dapit nga gi-lockdown tungod sa Coronavirus Disease.

Nabalaka lang ko nga kon dugay pa nga masulbad ang COVID-19 dinhi sa dakbayan, basi’g mahutdan og kwarta ang City Hall nga ikapalit og mga pagkaon nga ilang ipanghatag.