Kinsa’y mabasol?

Wa malilong sa kadaghanan nga si Cebu City Mayor Edgardo Labella way hunong pagserbisyo sa katawhan bisan og mikatap na dinhi sa siyudad ang Coronavirus Disease-19.

Kagahapon, mitumaw ang mga tabi-tabi nga na-ospital ang mayor tungod kay dunay post sa social media kabahin niini. Giteksan dayon nako ang mayor aron magpakisayod kon tinuod ba ni.

Tuod man, mitawag nako si Mayor Labella ug gitataw niya nga dili tinuod nga siya naospital. Matud niya nga mga duha ka semana na ang nilabay, nagpa-checkup ra siya kadiyot sa North General Hospital.

Kining katin-awan ni Mayor Labella maoy maghatag og katin-awan ug magwagtang sa kabalaka sa mga lumolupyo dinhi sa siyudad, ilabi na sa iyang mga dumadapig.

* * *

Daghan sa mga taga Sitio Zapatera sa Barangay Luz, Dakbayan sa Sugbo, nagpabaya ra gyud sa ilang panglawas kay bisan og nasayod na sila nga mikatap ang COVID-19 sa ilang dapit, padayon sila nga migawas sa ilang panimalay, ilabi na panahon sa gabii.

Ang mga masuk-anon nilang silingan, mikuha kanila og hulagway nga nagpakita sa ilang kagahi’g ulo. Mao kini ang rason ngano nga daghan kanila ang natakboyan og COVID-19 kay wa man sila makaila kinsa sa ilang mga silingan ang positive tungod kay sila mga “asympthomatic.”

Aw, karon nameligro na ang inyong kinabuhi tungod sa inyong pagpasagad. Kamong mga wa pa matakdi, tumana gyud ang awhag nga magpabilin kamo sa tagsa-tagsa ninyo ka panimalay.

* * *

Wa gyud ko masayop nga moabot ang higayon nga ang COVID-19 mokuyanap usab sa mga bilanggoan. Kagahapon, gibalita na nga adunay mga piniriso didto sa kaulohan nga natakboyan na og COVID-19.

Dili gyud kini kalikayan kay duna may mga tawo nga positive sa COVID-19, apan mga “asympthomatic” kun way mga timailhan nga natakboyan na diay sila sa maong mananakod nga sakit.

Sa ako na nga giingon, nagsinardinas ang mga piniriso sa mga bilanggoan, ilabi na diha sa Cebu City Jail sa Barangay Kalunasan, ug kon may makasulod niini nga positive sa COVID-19, dali ra kaayo kini nga mokatap ngadto sa ubang mga binilanggo.

Mentras nga wa pa kining maong problema dinhi sa ato, angay gyud nga pangitaan kini daan og pagpangandam sa mga tinugyanan sa Bureau of Jail Management and Penology (BJMP).

Apan ambot kon may budget ba kaha ang BJMP nga ikapalit og mga COVID-19 testing kits. Hangtud nga dili pa mogawas ang resulta, ang mga bag-ong piniriso, dili usa sila iipon sa ubang mga binilanggo.

Dili ba kini maayo? Unsay inyong ikasulti?