Duroha sa dageay sa kabos

Sawog nga kawayan ang gihigdaan sa akong nanay dihang iya kong gipakatawo ning kalibotan.

Nagtubo ko nga pirmeng makit-an ang atop nipa sa among balay nga maukab-ukab inig tayhop sa hangin ug daw nagpangatagak luha ang makusog ulan nga motulo gikan sa karton nga mao ray ikasarang ni tatay pagtapak sa mga buslot.

Among mga silingan, sama namo pobre sab. Sagad sa mga balay, payag.

Nga kondili amakan ang bungbong, mga buhing langkay sa lubi ray gisalimbong.

Apan bisan pag panagat ray gisaligan, makita sa ilang panagway ang kalipay, kabuotan ug kakugihan sa ilang pagpanikaysikay.

Wala sa ilang kinaiya ang pagkakayoan. Gani, mao pay mohatag-paambit sa kuha nilang isda ngadto sa mga silingan.

Panahon sa kagutom, wala ko mahinumdom nga nagpanon sila sa karsada, nagdalag plakards ug atubangan sa balay sa mayor, nagsiyagit og tabang kay wala nay sulod ilang tiyan.

Akong tatay, kay construction worker man to, kon walay proyekto ilang amo, bisag unsa lay mahunahunaang kapanginabuhian: mokuyog panagat, usahay magkargador, aron lamang kami dili magutman.

“Ayaw gyog pangayo sa uban, dong. Ulaw kaayo nang magtan-aw ka nga naay magkaon.

Mao nga lihok gyod kay tabangan ra ka sa Ginoo. Unya, puy-i ang kutob sa unsa man lang ang mahatag sa Ginoo nimo. Kon naa, naa. Kon wala, wala! Ayaw pangayo sa wala diha.

Ayaw kab-ota ang dili maabot!” Mga bulawanong pulong ni Tatay nga hangtod karon maoy gihimo nakong gabayan. Unya, dinha poy higayon, gidala ko niya sa siyudad aron pakit-on sa mga bulingit nga mangatulog sa aseras, sa mga nanaghubong dispatser ug sa mga dapit nagtapok daghang barongbarong nga daw tinapakang sinina ang pagkahimo.

Nakit-an nako ang mga bagsik  nagsugal, nag-inom ug hilig mangayog kuwarta sa mangagi. Ilang bayhon makahahadlok.

Ning pagbutho sa dakong pandemic crisis sa atong nasud, diin diha sa pagpanghatag og hinabang (pinansiyal man o pagkaon) sa gobiyerno ngadto sa katawhan, adunay pobre nga bisag wala makadawat nagpakahilom lang, unya duna poy pobre nga bisag daghan nag nadawat, sige gihapog putakputak, dili na ko mahibulong.

Kay lahi gyod ang dagway sa kabos nga nagtubo sa probinsiya ug sa nagdako-nagpakabuhi sa mga malang-og nga dapit sa dakbayan.