CIBUS makalipay, makaguol

Nunot sa pagbarog sa daghang dagkong edepisyo sa dakbayan sa Sugbo, nagkaanam sab kadaghan ang sakyanang nagdagan. Apan ang kadalanan nga agian sa mga transportasiyon kada adlaw, nagpabiling gamay, kay wala nay kairogan.

Ultimo si Presidente Rodrigo R. Duterte, niadtong ulahi niyang pagduaw ning atong siyudad, nakapanglingolingo human makita ang tinuorayng kahimtang sa mga sakyanang naghuot labi na panahon sa rush hours.

“Ang paghimog agianan sa itaas, (roads or railways) tingale, maoy usa sa makasulbad.” Sugyot niya.

Sugyot nga kon tumanon, nagkinahanglag binilyong budget ug taastaas panahon sa pagpaabot ug pagpailob. Kay samtang dili pa mapadak-an ang karsada, magkaanam pod kahuot ang trapiko nga halos kada adlaw adunay madugang nga bag-ong sakyanan.

Kadto lang pagsugod og panagan sa e-jeeps sa rotang gikan ug paingon sa Guadalupe, napun-an gyod og laing kalangay ang naandang kalangay nga hagbay rang giantos sa mga pasahero. Trak baya ang gidak-on sa e-jeep. Mopadaplin tuod kini inig pasakay ug pakanaog og pasahero, apan moangkon sab baya og kaugalingong espasyo nga makaali sa nagsunod.

Sa laktod, ang presensiya sa e-jeeps nga de airconditioner, unya may desenteng lingkoranan pa gyod, nakahatag tinuoray og kakomportable sa mga manakay. Pero, wala makatabang pagsulbad sa trapiko. Nakadugang sa suliran.

Ning umaabot Lunes, may 20 ka modernong bus, ubos sa pagdumala sa Vallacar Transit Inc., operator sa Ceres, nga padaganon sa dakbayan sa Sugbo subay sa rota gikan sa Cebu South Road Properties ngadto sa Fuente Osmeña, agig pagpatuman sa gisaad nga Cebu Interim Bus Service (CIBuS) samtang wala pa iimplementar og todo ang Bus Rapid Transit.

Matod pa ni LTFRB chairman Martin Delgra nga ang kamoderno sa mga bus, desenteng pasilidad ug ang binag-ong pamaagi sa serbiyso nga gigamit sa CIBuS makapausab kuno sa kinaiya sa mga biyahedor, kinsa kanunayng nag-antos sa kapait sa trapiko. Sa laktod, matagamtam na sa mga pasahero ang kakomportable sa pagbiyahe.

Nagpasabot ba kini nga ang kakomportable sa pagbiyahe, sa samang higayon, makapaluag sa kahuot sa trapiko? Basin bayag mosamot?  Ug ang kakomportable mahimong kapungot?

Ang maayong tumong sa CIBuS makalipay. Apan nahadlok ko, nga ang resulta, makapaguol. Dalan man god ang angay idugang. Ug dili mga sakyanan.