Kutob ra sa pasalig ang pangandam
Human sa pasidaan sa World Health Organization (WHO) nga ang pagsulbong sa mga kaso sa COVID-19 sa China mahimong mahitabo sab sa ubang kanasuran, kay nakakatap na ang kagaw sa wa pa hunonga ang mga biyahe sa mga ayroplano, tren ug buses gikan ug padung sa Wuhan ug kasilinganan, gilusad dayon ang mga pangandam sa kahigayonan sa dugang tinakdanay sa nagkalainlaing bahin sa kalibotan.
Atubangan sa pasidaan sa WHO, nipasalig silang Health Secretary Francisco Duque III ug kaubanan nga andam nang gobyerno. Apan subling nipasalig nga way tinakdanay dinhi sa ato.
* * *
Duha na ka nasud nga pulos silingan sa Pilipinas ang way lipudlipod nga nipadayag og kabalaka nga mahimong nagsugod na ang lokal nga tinakdanay sa ilang mga teritoryo:
• Ang mga eksperto sa Japan nangagpas nga ang paspas nga tinakdanay sa mga pasahero sa cruise ship nga ilang gi-quarantine sa Yokohama mahimong mao say mahitabo sa mainland; ug
• Si Primero Ministro Lee Hsien Loong sa Singapore niangkon nga nagsugod nang tinakdanay sa pipila sa ilang mga molupyo nga wa makataak sa Wuhan ni sa bisan asang bahin sa China.
* * *
Bisan ang mga eksperto sa Estados Unidos, pinaagi sa ilang Centers for Disease Control and Prevention (CDC), nikumpisal nga ang ilang mahimo mao ra ang paglangay apan di gyud makapugong sa pagkatap sa kagaw sa mga molupyo sa nagkalainlaing bahin sa nasud.
Maong ang tulo ka nasud nagmugna dayon og kahimanan nga mas paspas nga moila sa kagaw aron nga mas daling matambalan ang mga pasyente ug nag-andam og sistema aron di moawas sa mga tambalanan ang magbaha unyang mga pasyente.
* * *
Nakadawat nang Pilipinas gikan sa WHO og kapin sa 200,000 ka test kits nga makatabang sa Research Institute for Tropical Medicine (RITM) pag-ila sa COVID-19; ug giila nang upat ka tambalanan nga mahisama sa RITM aron mas paspas nga masubli ang swab samples sa mga pasyenteng gidudahang natakdan sa COVID-19.
Nakadawat na sa test kits ang Vicente Sotto Memorial Medical Center nga nagbase sa Cebu City nga maoy tahasan pagsubli sa tanang gidudahang kaso sa Kabisasy-an.
Apan di pa kasugod og trabaho kay wa pay makina ug wa pa mabansay ang mga kawani.
* * *
- Latest
