Jamaica ug Corona

Niadtong Enero 28, 2020 gitay-og sa 7.7 magnitude nga linog ang Jamaica ug Cuba. Daghan gyud tingali ang nangadaut adtong kalakiha.

Dugang pa, di kapangandakan ang gitawag natong kalisang nga naani ni bisan kinsang makasinati sa ingon. Ingon ana gyud nang katalagman. Pun-an pa sa Corona Virus gikan sa Wuhan China nga padayong nihulga sa kadaghanan.

Ang akong higala nga nakabase karon sa Estados Unidos ang dili na lang mopauli tungod kay gidid-an sila tungod sa Corona Virus. Matud pa nila dili pa kaha ni Biological Warfare?

Ambot lang kaha kun tinuod ba kining maong pangagpas. Mahimong matinuod gyud tingali kun maghisgot na ta niini diha sa atong mga nakita sa televisions labina sa mga salida nga Mission Impossible.

Sa akong personal nga panahom nahimong mas tiguwang na gyud ang kalibutan alang kanako. Mao nga niabot na pud ang adlaw sa pagpaningil.

Ang paglihok sa mga tectonic plates, ang mga sakit, ang uban pang mga panghitabo mahimong man made o binuhatan sa tawo apan mahimo pud nga atong naani gumikan sa atong pagpasagad sa kalibutan nga atong gipuy-an.

Ang kainit sa adlaw nakapasamot gyud tingali sa kainit pud nga nasinati ilawom sa kalibutan. Ang kahakog sa pag-angkon og teritoryo mao man ang hinungdan kun nganong mas daghan ang nahimong makigpatay na lang makuha lang ang gusto.

Ang pagkahimong traydor sa kaugalingong nasud mao man ang hinungdan kun nganong daghang mga tawo ang dili makatuo kun nganong nahimong way tingog ang kadaghanan kanato bisan tataw na kaayo nga nahimo kitang mga langyaw sa kaugalingong nasud.

Nagpasabot ba kini nga angayan na pud kitang tay-ogon aron sa ingon mamahimo kitang makaamgo gumikan sa atong binuhatan nga dili maayo? Silot na ba gyud kini sa  Ginoo o pasidaan mismo sa atong planeta nga ang tanan dunay katapusan?

Ug kay dunay katapusan angayan lamang nga kita magmatngon sa atong mapasagarong kinaiya? Gikinahanglan gyud ang Ortio Imperata ug kuyog ning maong pangaliya kita unta mamahimong mas hamtong pa gyud sa atong pagsabot sa kalibutan nga atong gipuy-an. When we strike nature, nature strikes back matud pa nila.