Pagpatay sa pay parking zone gikaguol

Nagkaanam kadagaghan ang sakyanang magdagan kada adlaw. Kini walay labot sa mga sakyanang gibilin sa mga Pay Parking Zone dinhi sa dakbayan sa Sugbo.

Kana lang mga dalan nga haduol sa Chong Hua Hospital, Fuente Osmeña, alas 10:00 pa lang sa buntag, ang mga Pay Parking Zone puno na. Hakang lisora pangitag bakante!

Tuod, may Cybergate building nga adunay parking space sa ilawom, anaay parking area sa Chong Hua Hospital ug Chong Hua Medical Arts. Apan pastilan, wala pa gani alas 11 sa buntag, ang tanan okupado na. Maglinya intawon ang mga sakyanang wala nay masuksokan.

Bisan mga Pay Parking Zone likod sa Rajah Park Hotel, Cebu Doctors Hospital ug uban pa, sige pod nig kapuno. Sagad ra bang sakay o modrayeb ning maong mga sakyanan, kinsa gustong moparking, may appointment time nga giapas.

Mga talan-awong nagpakita nga bisan sa kadaghang Pay Parking Zone ang gipagamit sa gobiyerno, kanunay gyod kining puno panahon sa business hours.

Ug dili kay ang mga Pay Parking Zone lang. Kondili hasta tanang karsada nga naglibot sa tibuok siyudad.

“Asa na man lang ko parking ini?” Sagad lingolingo-tuaw sa mga drayber nga nag-antos sa nag-aginod nga bumper to bumper nga dagan sa mga behikulo, kinsa iyahayg pangitag bakanteng luna nga kaparkingan.

May pipila nga mibalik sa ilaha, gibilin ilang sakyanan ug nakahukom nga magtaksi na lang.

Kon hingpit nang wad-on ang Pay Parking Zone, ang tanang sakyanan nga nia magparkingan niining dapita mapugos gyod pagtipon ngadto sa naghuot nga sakyanang nagdagan sa karsada (main road man, o dili).

Ug dinhi atong maaninaw nga mosamot kapuno ang kadalanan nga puno nang daan sa grabeng problema sa trapiko. Samot na, panahon sa rush hours.

Hayahay ang may mga bakanteng lote kay mahimo nilang i-convert og Pay Parking business. Small capital ray gikinahanglan pero big dividend.

Sakit para sa panudlanan sa siyudad kay minilyon ka pesos ang mawala.

Ug mas grabe pa kasakit alang sa mga tag-iyag sakyanan, kay kining pagpatay sa Pay Parking Zone sama ra nga gipatay pod sa gobiyerno ang kinabuhi sa inadlawng nilang panginahanglan.

Busa, gikaguol gyod sa kadaghanan. Unta, may tukmang dapit nga kabalhinan.